Amasengesho ya nimugoroba II

AMASENGESHO YA NIMUGOROBA: Uburyo bwa kabiri

Intangiriro

Mana ngwino unyikirize + Nyagasani banguka undengere.
Hubahwe Imana Data na Mwana na Roho Mutagatifu, nk’uko bisanzwe iteka, bubahwe n’ubu n’iteka ryose. Amen.
Alleluya (usibye mu Gisibo)

Indirimbo

GANZA ITEKA (D 54)
Ganza iteka Mwami wo mu ijuru, ganza iteka, duhora tukurata.
1. Ganza iteka, Mwami w’abami, Nyir’ingoma, Rugira watwiguranye.
Ganza iteka, we Mwami w’abami, ukuzwe n’abo wacunguye.
2. Kuzwa iteka we, Mwami w’ituze n’amahoro, Rugaba ganza ntuganzwe;
Kuzwa iteka we, Mwami w’abami, mu ntore zawe zose ukuzwe.
3. Rambagira, we Mwami w’abami, vugirizwa ingoma, insengo n’impanda;
Rambagira we, amajwi yose y’abakristu akuririmbe.
4. Nyir’ikuzo we ridusamaje, rihanitse, dukome yombi tuvuga :
Nyir’ikuzo we, ubiharirwe mu biremwa byose urakuzwa.

Cyangwa

KRISTU NYIR’IMPUHWE (X 4)
1. Kristu Nyir’impuhwe, Nyir’ineza, duhe kukumenya no kugukunda,
Nzira y’abawe, urumuri rwacu, uratwiyoborere kuri Data.
2. Uri uburuhukiro bw’abarembye, ni wowe soko ivomwamo imbaraga,
Jya uduha kwitsa imirimo yacu, tuze kukwambaza Mwimanyi.
3. Uduhe guhuza umutima nawe, tubone ubukundana uko wabivuze,
Ujye utugoborera ineza yawe, tubone icyo twungura abadusanze.

Cyangwa

SHIMWA, NYAGASANI (X 6)
Shimwa, Nyagasani, singizwa ku isi hose, habwa ikuzo, wowe, Nyir’ibiremwa,
Ingoma yawe niyogere hose, Mana yacu ganza.
1. Umva amajwi y’abana bawe bagukunda, Mwimanyi,
Nyir’ububasha, shimwa, kuzwa, wubahwe n’abo wabyaye.
2. Uri inzira y’ubuzima, ukuri kwacu ni Wowe,
Rumuri rwacu, turakwizeye.
3. Wohereje Umwana wawe, ngo atubere igitambo,
Turagushima, kundwa Mana, uratwe Nyir’urukundo.
4. Hubahwe Imana Rurema,
Hubahwe Data na Mwana,
Hubahwe na Roho Mutagatifu.

Cyangwa

NTA KINTU CYIZA (X 13)
Nta kintu cyiza nko guhorana n’Iyaturemye.
1. Nyagasani ni inking yanjye, ni n’amirukiro yanjye.
2. Nyagasani ni umukiza wanjye, ni we Mana yanjye.
3. Nyagasani ni we maboko yanjye, ni we rumuri rwanjye.
4. Nyagasani ni we buhungiro bw’imbabare, mu makuba yazo.
5. Ibyiza Nyagasani yakoze nibimusingize, nibimurate, nibimuririmbe.

Igisingizo cya Kristu : Abanyakolosi 1, 12-20

Nimunezerwe kandi mushimire Imana Data watumye mugira umugabane ku murage w’abatagatifujwe bari mu mucyo. Koko rero, yatugobotoye ku ngoyi y’umwijima, atujyana mu Ngoma y’Umwana we akunda byimazeyo, ari na We dukesha gucungurwa no kubabarirwa ibyaha.
Ni We shusho ry’Imana itagaragara,
Umuvukambere mu byitwa ikiremwa cyose,
Kuko byose byaremwe muri We,
Ari ibiri mu ijuru, ari n’ibiri ku isi.
Ibigaragara n’ibitagaragara,
Ibinyabubasha n’Inganji, Ibikomangoma n’Ibihangange :
Byose byaremwe na We, kandi ni we byaremewe ;
Yariho mbere ya byose,
Kandi byose bibeshwaho na We.
Ni We kandi Mutwe w’umubiri, ari wo Kiliziya,
Akaba n’Ishingiro, n’Umuvukambere mu bapfuye,
Kugira ngo ahorane muri byose umwanya w’ibanze;
Kuko Imana yizihijwe no kumusenderezamo ibyiza byose,
Kandi muri We yiyunga n’ibiriho byose,
Ndetse ari We ibigirira,
Ari ibiri ku isi, ari n’ibiri mu ijuru,
Byose ibisakazaho amahoro
Aturutse ku maraso ye yameneye ku musaraba.
Inyikirizo : Habwa ikuzo Nyagasani, icyubahiro, ububasha n’ishema.

Cyangwa Abanyefezi 1, 3-10
Nihasingizwe Imana, Se w’Umwami wacu Yezu Kristu,
Yo yadusakajemo imigisha y’amoko yose, ituruka kuri Roho, mu ijuru, ku bwa Kristu.
Nguko uko yadutoreye muri We nyine,
Mbere y’ihangwa ry’ibiriho byose,
Kugira ngo tuzayihore imbere mu rukundo,
Turi intungane n’abaziranenge.
Igena ityo mbere y’igihe,
Ko tuzayibera abana yihitiyemo,
Tubikesheje Yezu Kristu.
Uko ni ko yabyishakiye ku buntu bwayo,
Kugira ngo izahore isingirizwa ingabire
Yaduhereye ubuntu mu Mwana wayo w’Inkoramutima.
Ni We dukesha ugucunguzwa amaraso ye,
Tukamuronkeramo imbabazi z’ibyaha byacu,
Ku rugero rw’ubusendere bw’ineza yayo,
Ikaba yarabudusesekajemo ibigiranye ubuhanga n’ubumenyi bwose.
Yaduhishuriye ibanga ry’ugushaka kwayo,
Wa mugambi wuje urugwiro yari yifitemo kuva kera,
Ngo izawuzuze ibihe bigeze :
Umugambi wo gukoranyiriza ibintu byose ku Mutware umwe rukumbi, Kristu,
Ari ibiri mu ijuru, ari n’ibiri ku isi.

Inyikirizo : Uragasingizwa Mubyeyi wacu, Wowe waduhereye umugisha muri Kristu.

Zaburi

Inyikirizo (Zab 113 (112)) Nihasingizwe izina rya Nyagasani, ubu n’iteka ryose.

1. Alleluya !
Bayoboke b’Uhoraho, nimuhanike ibisingizo
Maze musingize izina ry’Uhoraho !
2. Izina ry’Uhoraho nirisingizwe,
Ubu ngubu n’iteka ryose !
3. Kuva igihe izuba rirashe kugeza ubwo rirenga,
Nihasingizwe izina ry’Uhoraho !
4. Uhoraho asumba kure amahanga yose,
N’ikuzo rye rigasumba ijuru.
5. Ni nde wamera nk’Uhoraho Imana yacu,
We utetse i Jabiro hejuru iyo gihera,
6. Maze akunama areba ijuru n’isi hasi ye?
7. Ahagurutsa indushyi mu mukungugu,
Akavana umutindi mu cyavu.
8. Kugira ngo amwicaze hamwe n’abakomeye,
Abakomeye bo mu muryango we.
9. Umugore wari ingumba amushakira inzu,
Akamugira umubyeyi wizihiwe mu bana be.

Cyangwa Zab 130 (129)

Inyikirizo:
Ubuvunyi n’ingabire bituruka kuri Uhoraho 1. Uhoraho, ndagutakambira ngeze kure,
2. Uhoraho, umva ijwi ryanjye. Utege amatwi ijwi ry’amaganya yanjye!
3. Uhoraho, uramutse witaye ku byaha byacu, Nyagasani, ni nde warokoka?
4. Ariko rero usanganywe imbabazi, kugira ngo baguhoranire icyubahiro.
5. Nizeye Uhoraho n’umutima wanjye wose, nizeye ijambo rye,
6. Umutima wanjye urarikiye Uhoraho kurusha uko umuraririzi ategereza umuseke,
Rwose kurusha uko umurarizi ategereza umuseke.
7. Israheli niyizere Uhoraho, kuko ahorana imbabazi, akagira ubuntu butagira urugero.
8. Ni we uzakiza Israheli ibicumuro byayo byose.

Isomo

1 Petero 3, 8-9
Ahasigaye, nimutekereze ibihuje, mugirirane impuhwe, mukundane urwa kivandimwe, mube abanyambabazi kandi mwicishe bugufi. Ntimukiture undi inabi yabagiriye, cyangwa ngo nabatuka mumusubize; ahubwo mwifurizanye umugisha, kuko ari cyo mwahamagariwe, kugira ngo muzahabwe umugisha ho umurage.

Igisubizo : “Nishyize mu biganza byawe Nyagasani.”
- Ni wowe uducungura Nyagasani, Mana y’ukuri.
“Nishyize mu biganza byawe Nyagasani.”

Indirimbo ya Bikira Mariya : Lk 1, 47-55.

Inyikirizo yo ku mibyizi :
Uhoraho yangiriye ibintu by’agatangaza, izina rye ni ritagatifu.
Inyikirizo yo ku cyumweru :
Ku mugoroba wa Pasika abigishwa bamenye Nyagasani, igihe yamanyuraga umugati.

«Umutima wanjye urasingiza Nyagasani, kandi na roho yanjye ihimbajwe n’Imana Umukiza wanjye.
Kuko yibutse umuja we utavugwaga, rwose, kuva ubu amasekuruza yose azanyita umuhire.
Umushoborabyose yankoreye ibitangaza, Izina rye ni ritagatifu,
Impuhwe ze zisesekarizwa abamutinya bo mu bihe byose.
Yagaragaje ububasha bw’amaboko ye, atatanya abantu birata ;
Yahanantuye abakomeye abakura ku ntebe zabo, maze akuza ab’intamenyekana ;
Abashonji yabagwirije ibintu, abakungu abasezerera amara masa.
Yagobotoye Israheli umugaragu we, bityo yibuka impuhwe ze,
Nk’uko yari yarabibwiye abakurambere bacu, agirira Abrahamu n’urubyaro rwe iteka. »

Amasengesho yo gusaba

Dusabe Imana, Umubyeyi wacu, We ukunda abana be kandi ntiyirengagize amasezerano yabo, tumubwire twiyoroheje tuti « NYAGASANI UTWIYEGEREZE. »
- Mana y’urukundo, wowe wagiranye n’umuryango wawe isezerano ry’iteka, dufashe kwibuka ibitangaza byawe. Tubisabe Imana.
- Kiliziya yawe uyihe kujya mbere mu rukundo, kandi abakwemera ubakomeze mu bumwe no mu mahoro. Tubisabe Imana.
- Nyagasani, duhe kutakwirengagiza mu mitunganyirize y’iyi si, maze imigirire yacu ihuze n’ugushaka kwawe. Tubisabe Imana.
- Ohereza abakozi mu murima wawe, kugira ngo izina ryawe rimenyekane mu miryango yose. Tubisabe Imana.
- Abapfuye bahe kureba uruhanga rwawe, natwe uduhe kuzasangira na bo umunezero w’ubwiza bwawe. Tubisabe Imana.
(Bashobora kongera andi).

Dawe uri mu ijuru

Dawe uri mu ijuru, izina ryawe ryubahwe, ingoma yawe yogere hose. Icyo ushaka gikorwe munsi nk’uko gikorwa mu ijuru. Ifunguro ridutunga uriduhe none; utubabarire ibicumuro byacu, nk’uko natwe tubabarira abaducumuyeho; ntudutererane mu bitwoshya, ahubwo udukize icyago. Amen.

Isengesho risoza

Ku mibyizi :
Mana itumurikira, duhe gutsinda imitego y’umwanzi muri iri joro, maze mu gitondo tuzahimbarirwe imbere yawe, tugushimira muri Yezu Kristu Umwana wawe n’Umwami wacu. Amen.

Ku cyumweru :
Nyagasani, gumana natwe kuko bwije n’umunsi ukaba uciye ikibu ; susurutsa imitima yacu iyoboke inzira zawe, tuguhishure mu Byanditswe bitagatifu. Ibyo turabigusabye ku bwa Yezu Kristu, Umwana wawe n’Umwami wacu. Amen.

Umusozo

Imana iduhe umugisha + iturinde ikibi cyose, kandi izatugeze mu bugingo bw’iteka. Amen.
- Dusingize Nyagasani.
- Dushimiye Imana.
(Byaba byiza kuvuga indamutso ya Malayika aya masengesho arangiye).