Uburyo bwa kabiri

AMASENGESHO YA MUGITONDO : Uburyo bwa kabiri

Nyagasani, bumbura umunwa wanjye + Maze ururimi rwanjye ruzatangaze ibisingizo byawe.
Hubahwe Imana Data na Mwana na Roho Mutagatifu, nk’uko bisanzwe iteka, bubahwe n’ubu n’iteka ryose. Amen.

Inyikirizo:
Nimuze dusingize Nyagasani, Imana yacu (Zab 95 (94), Alleluya (usibye mu Gisibo)

1. Nimuze, tuvugirize impundu Uhoraho,
   turirimbe urutare rudukiza;
   
2. Tumuhinguke imbere tumurata,
   Tumuririmbire ibisingizo.
   
3. Kuko Uhoraho ari Imana y’igihangange,
   Ni Umwami w’igihangange, asumba imana zose.
   
4. Ni we ufashe imizi y’isi mu kiganza cye,
   Maze akagenga n’impinga z’imisozi.
   
   
5. Inyanja ni iye, ni we wayiremye,
   N’ubutaka bwumutse bwabumbwe n’ibiganza bye.
   
6. Nimwinjire, duhine umugongo twuname;
   Dutere ivi imbere y’Uhoraho waturemye.
   
7. Kuko we ari Imana yacu,
   Naho twe tukaba imbaga yo mu rwuri rwe,
   N’ubushyo buragiwe n’ikiganza cye.
   
   
8. Iyaba uyu munsi mwakundaga kumva ijwi rye!
   “Ntimugundirize imitima yanyu nk’i Meriba
   Nko ku munsi w’i Masa, mu butayu,
   
9. Aho abasekuruza banyu banyinjaga,
   Aho bangeragerezaga, nubwo bari barabonye ibikorwa byanjye.
   
   
10. Mu myaka mirongo ine nazinutswe iyo nyoko,
    Maze ndavuga nti ‘Ni imbaga y’umutima wararutse,
    Ntibazi amayira yanjye!’
    
11. Ni cyo cyatumye ndahirana uburakari
    Ko batazinjira mu buruhukiro bwanjye.”
    

Igisingizo

Inyikirizo :
Nimusingize Rurema wuzuye urukundo waduhaye ubugingo bw’iteka.
Imana yaremye byose ibiha umugisha Uko yari yabitekereje kuva kera.
Akira amasengesho yacu, Turagusenga.
Yaremye abantu irema abamalayika Nk’uko yari yabitekereje kuva kera.
Akira amasengesho yacu, Turagusingiza.
Ibintu byose yabikuye mu busa Ibisenderezamo urukundo n’ubwigenge bwinshi.
Akira amasengesho yacu, Turagushimira.
Hubahwe Imana Data na Mwana na Roho Mutagatifu; Nk’uko bisanzwe iteka bubahwe n’ubu n’iteka ryose.
Amen.

Horana impundu Rurema iteka ryose. Amen.

Cyangwa :
HARAGASINGIZWA UHORAHO (X 2)

Haragasingizwa Uhoraho, waremye ijuru n’isi, Yadukijije umurage w’icyaha, atugabira ubuzima.

1. Nyagasani, icyo twifuza ni ukubana nawe;
Hari byinshi bitubuza kukugana,
Hari n’ibindi turarikira twebwe bene muntu,
Udufashe tukwegere, Wowe hirwe ridashira.
2. Nyagasani, uratege amatwi icyo tukubwira;
Ntuzatume tuba nk’abana b’ibirara,
Reba amatungo arasiganwa kandi asanga urwuri,
Abakozi bananiwe, Dawe, twese utwakire.
3. Nyagasani, iyo twiyibutsa ibyo watugiriye,
Udufashe tutinubira ibiturushya,
Tumenye uwahanze isi n’ibiyituye,
Ibiremwa bisingize Wowe Uhoraho iteka.


Cyangwa :

GWIZA UMUBANO MU BANTU (X 8)
1. Gwiza umubano mu bantu, Mana Nyir’ubugingo,
Duhe ubumwe n’urukundo, soko y’ubutabera.
2. Tuza mu mitima yose umucyo n’ibyishimo,
Mana ihorana uburanga, bengerana ishya hose.
3. Izina ryawe, Rurema, ni izina ry’ububasha,
Burangwa n’ibyo wahanze, bitatse ijuru n’isi.


Cyangwa :

MAHANGA YOSE (Zab 66 (65))

Isi yose nihimbazwe n’Imana Isingize izina ryayo.

2. Mahanga yose, nimusingize Imana,
Muririmbe ikuzo ry’izina ryayo,
Muyikuze muvuga ibisingizo byayo.
3. Nimubwire Imana muti
“Mbega ibikorwa byawe ngo biratera ubwoba!
Abanzi bawe bageze aho kuguhakwaho
Kubera ububasha bwawe bukaze.
4. Abatuye isi yose bapfukamye imbere yawe,
Bakagucurangira baririmba izina ryawe!”
5. Nimuze mwirorere ibikorwa by’Imana,
Yo abantu batinyira imyato:
6. Yahinduye inyanja ubutaka bwumutse,
N’uruzi barwambuka ku maguru rwakamye kare;
Ni yo mpamvu tuyigirira ibirori.
8. Bihugu mwese, nimurate Imana yacu,
Muhanike amajwi muririmba ibisingizo byayo;
16. Abubaha Imana mwese, nimuze mwumve,
Mbatekerereze ibitangaza yankoreye.
20. Imana iragahora isingizwa,
Yo itirengagije isengesho ryanjye,
Cyangwa ngo ireke kungirira ubuntu.
Zaburi

I. Inyikirizo :(Zab 63 (62))
1. Ndashaka kugusingiza Mana yanjye
Ku bw’izina ryawe, nzamuye ibiganza.
2. Nyagasani, ni wowe Mana yanjye,
Mpora ngushaka uko bukeye!
3. Naguhanze amaso aho uri mu Ngoro Ntagatifu,
Mbona ububasha bwawe n’ikuzo ryawe;
4. Ineza yawe nsanga yaguranwa amagara y’umuntu
Umunwa wanjye uhora ukwamamaza.
5. Koko nzahora ngusingiza igihe cyose nkiriho,
Izina ryawe nditegere amaboko nkwiyambaza.
6. Nzamera nk’umuntu wahaze ibinure n’imisokoro,
Ibitwenge bimpore ku munwa kubera ibyishimo
Maze ndirimbe nezerewe kubera ibisingizo byawe.
7. Iyo ngutekereje aho ndyamye,
Mara amasaha ngusenga,
8. Kuko utahwemye kuntabara,
Nzavugiriza impundu aho nibereye
Mu gicucu cy’amababa yawe.
9. Nkwizirikaho n’umutima wanjye wose,
Ukuboko kwawe kw’indyo kukandamira.

II. Inyikirizo : Zab 148
Nimumukuze kandi mumurate ubuziraherezo
1. Nimukuze mwese Imana kuva mu ijuru ryose. Nimukuze mwese Imana.
2. Muyikuze mwese namwe Bamalayika beza. Nimukuze mwese Imana.
3. Muyikuze mwese ahantu ho mu ijuru. Nimukuze mwese Imana.
4. Muyikuze mwese, wowe zuba nawe kwezi. Nimukuze mwese Imana.
5. Muyikuze mwese, mwebwe nyenyeri z’umucyo. Nimukuze mwese Imana.
6. Muyikuze mwese, namwe mazi yo mu ijuru. Nimukuze mwese Imana.
7. Muyikuze mwese, mwebwe nyoni zo mu kirere. Nimukuze mwese Imana.
8. Nimukuze mwese izina ry’Imana, yo yavuze rimwe, byose bugacya bibaho.
Alleluya, Nimukuze mwese Imana, Nimukuze mwese izina ry’Imana.
9. Yabikomereje guhama iteka, yategetse itegeko ridashobora gukura.
Alleluya, Nimukuze mwese Imana, Nimukuze mwese izina ry’Imana.
10. Nimukuze mwese Imana ku isi yose,
Mwebwe bikoko byo mu biyaga no mu nyanja zose.
11. Wowe muriro, nawe rubura,
Mwebwe mahindu, wowe muyaga,
Wowe urangiza ijambo rye.
12. Mwebwe misozi, namwe dutaba twose,
Mwebwe biti by’imbuto zose,
Mwebwe masederi yose.
13. Mwebwe bategetsi bo ku isi,
Mwebwe bantu mwese,
Mwebwe bikomangoma, bacamanza mwese.
14. Mwebwe basore namwe kandi bangavu,
Mwebwe Basaza kimwe n’abana.
15. Nimukuze mwese izina ry’Imana
Ni ryo ryonyine risumba ayandi yose.
Inganji yayo ikwiye ku isi no mu ijuru
Alleluya, Nimukuze mwese Imana,
Nimukuze mwese izina ry’Imana.

III. Inyikirizo : Zab 117 (116)
Mahanga yose, nimusingize Uhoraho.
1. Mahanga mwese, nimusingize Uhoraho,
Miryango mwese, mumwamamaze;
2. Kuko urukundo adukunda rutagira urugero,
Ubudahemuka bwe bugahoraho iteka!

Isomo

Ku mibyizi : Abanyafilipi 4, 8-9
Ahasigaye, bavandimwe, icyitwa icy’ukuri cyose kimwe n’igikwiye kubahwa, igitunganye, ikitagira inenge, igikwiye gukundwa no kuratwa, mbese icyitwa ingeso nziza cyose kandi gikwiriye ishimwe, abe ari cyo muharanira. Ibyo nabigishije kandi mwemeye, ibyo mwanyumvanye kandi mwambonanye, mujye mubikora, maze Imana y’amahoro izahorane namwe.

Ku cyumweru : Matayo 28, 1-10
Isabato irangiye, ku wa mbere wayo mu museso, Mariya Madalena na Mariya wundi bazindukira ku mva. Ubwo isi ihinda umushyitsi mwinshi; umumalayika wa Nyagasani amanuka mu ijuru aregera, ahirika ibuye, aryicara hejuru. Yari ameze nk’umurabyo, umwambaro we wera nk’urubura. Abarinzi bamurabutswe bakuka umutima, bamera nk’abapfuye. Ariko wa mumalayika araterura, abwira abagore ati “Mwebweho mwitinya! Nzi ko mushaka Yezu wabambwe ku musaraba. Ntari hano, yazutse nk’uko yari yarabivuze; nimuze mwirebere aho yari arambitse. None rero, nimugende mwihuta, mubwire abigishwa be ko yazutse, kandi ko agiye kubatanga mu Galileya; niho muzamubonera. Ngibyo ibyo nari mfite kubabwira.” Ubwo abagore bava ku mva bafite ubwoba buvanze n’ibyishimo byinshi, bihutira kubwira abigishwa be iyo nkuru. Ni bwo Yezu ahuye nab o ati “Nimugire amahoro!” Baramwegera, bahobera ibirenge bye, bamupfukamye imbere. Nuko Yezu arababwira ati “Mwitinya! Ahubwo nimugende mubwire abavandimwe banjye bajye mu Galileya; ni ho bazambonera.”.

Cyangwa Luka 24, 1-12, n’ahandi.


Igisubizo :
“Nzasingiza Nyagasani, iteka n’ahantu hose (2).” Ibisingizo bye bizahora ubudatuza mu munwa wanjye, “iteka n’ahantu hose.”
Hubahwe Imana Data na Mwana na Roho Mutagatifu,
“Nzasingiza Nyagasani, iteka n’ahantu hose.”

Indirimbo ya Zakariya : Lk 1, 68-79

Inyikirizo :
Amahanga yose azaza apfukame imbere yawe, Kuko wowe wenyine uri Nyir’ubutagatifu. Nihasingizwe Nyagasani, Imana ya Israheli,
Kuko yasuye umuryango we kandi akawukiza.
Yatugoboreye ububasha budukiza, mu nzu ya Dawudi umugaragu we,
Nk’uko abahanuzi be batagatifu bari barabitumenyesheje kuva kera ko azadukiza abanzi bacu,
Akatugobotora mu nzara z’abatwanga bose.
Yagiriye impuhwe ababyeyi bacu, maze yibuka isezerano rye ritagatifu
Ya ndahiro yarahiriye Abrahamu umubyeyi wacu, avuga ko namara kutugobotora mu maboko y’abanzi bacu,
Azaduha kumukorera nta cyo twikanga, turangwa n’ubuyoboke hamwe n’ubutungane,
Iminsi yose y’ukubaho kwacu.
Nawe rero wa kana we, uzitwa umuhanuzi w’Umusumbabyose,
Kuko uzabanziriza Nyagasani ngo umutegurire amayira, ukamenyesha umuryango we umukiro,
Bazakesha kubabarirwa ibyaha byabo.
Koko Imana yacu igira impuhwe zihebuje,
Ari zo zatumye Zubarirashe amanuka mu ijuru aje kudusura,
Akabonekera abari batuye mu mwijima no mu gicuku cy’urupfu,
Kugira ngo atuyobore mu nzira y’amaho.

Amasengesho yo gusaba

Dusabe Imana, Umubyeyi wacu ushobora byose, We wumvana ubwuzu ukwinginga kw’abana be, tumusingize tugira tuti “NYAGASANI UTWUMVE UTUBABARIRE”.

- Mana ihoraho kandi ishobora byose, muri Batisimu waduhaye urumuri rushya; uyu munsi udufashe tugendere muri urwo rumuri. Tubisabe Imana.
- Tugabire ubwitonzi bwawe, kugira ngo buherekeze imirimo yacu yose kandi buyikomeze. Tubisabe Imana.
- Nyagasani, uyu munsi uduhe ingabire zawe kandi uturinde icyaha. Tubisabe Imana.
- Uratubere umuvunyi n’umurengezi, kandi uduhe ubwumvikane n’amahoro. Tubisabe Imana.
Dawe uri mu ijuru

Dawe uri mu ijuru, izina ryawe ryubahwe, ingoma yawe yogere hose. Icyo ushaka gikorwe munsi nk’uko gikorwa mu ijuru. Ifunguro ridutunga uriduhe none; utubabarire ibicumuro byacu, nk’uko natwe tubabarira abaducumuyeho; ntudutererane mu bitwoshya, ahubwo udukize icyago. Amen.

Isengesho risoza

Ku mibyizi
Nyagasani, ineza yawe nimurikire ibikorwa byacu byose, maze amasengesho n’imirimo yacu bigire isoko muri wowe, kandi bihabwe nawe indunduro nziza. Ibyo tubigusabye ku bwa Yezu Kristu, Umwami wacu. Amen.

Ku cyumweru
Mana, wowe ushyira ibyishimo by’ukuri mu mbaga yawe, ugaha umuryango wawe umunezero utazashira, turagusaba ngo uduhe guhorana ubwuzu mu byawe, maze tukogeze, tukumenyeshe n’abatakuzi. Ibyo tibigusabye ku bwa Yezu Kristu, Umwami wacu. Amen.

Umusozo

Imana niduhe umugisha + iturinde ikibi cyose, kandi izatugeze mu bugingo bw’iteka. Amen.

- Dusingize Nyagasani.
- Dushimiye Imana.

(Byaba byiza kuvuga indamutso ya Malayika aya masengesho arangiye).