Andi masengesho

Nyagasani, turagusaba inema yawe, ibanzirize ibyo dukora maze ukomeze kubidufashamo. Amasengesho n'ibyo dukora bijye biba ari wowe biturukaho, kandi bikuganeho. Amen.

Isengesho rivugwa mbere yo kurya

Mana yanjye, uhe umugisha ibyo ngiye kurya, bintere imbaraga zo kugukorera. Amen.

Cyangwa:
Duhe umugisha Nyagasani, uhe umugisha iri funguro duhawe ku buntu bwawe. Umwami w'ikuzo aduhe gusangira na We ku meza yo mu ijuru. Amen.

Cyangwa :
Nyagasani, duhe umugisha, ha umugisha iri funguro uwuhe n'abariteguye, kandi uhe n'abashonji ikibatunga. Amen.

Cyangwa:
Nyagasani Yezu Kristu, Mugati w'ubuzima n'uw'ukubaho kw'iteka, nk'uko wagaburiye imbaga y'abantu bashonje, ha umugisha iri funguro kugira ngo abagiye kurisangira tugire ubuzima bwiza, Wowe ubaho ugategeka iteka ryose. Amen.

Isengesho rivugwa barangije kurya

Mana ihoraho ugategeka iteka, turagushimira ibyo uduhaye. Amen.

Cyangwa:
Mana ishobora byose, tugushimiye ibyiza byose utugirira, wowe ubaho ugategeka iteka ryose. Amen.
Cyangwa:

Nyagasani, umaze kuduhagisha ingabire zawe. Tugushimiye ubuntu utugiriye kandi turitabaza imbabazi zawe, kugira ngo iri funguro ryo gutunga umubiri wacu ridtuma twirara tukakwibagirwa. Amen.

Cyangwa:
Nyagasani, tugushimiye iri funguro n'ibi byishimo uduhaye. Amen.

Isengesho ryo gushimira Imana ibyiza itugirira

"Ndagushimiye Dawe, kuko ibyo byose wabihishe abakomeye n'abanyabwenge, ukabihishurira abaciye bugufi." Ndagushimiye Dawe Nyir'ubutagatifu, Muremyi n'Umugenga wa byose, ibiboneka n'ibitaboneka. Abamalayika mu ijuru barakuramya, n'abatagatifu mu bwami baragusingiza ; utambutse kure ubwenge bwacu, nyamara ni wowe uturi hafi, ukaduhumuriza, ukanatwizeza. Uri Umubyeyi udukunda byimazeyo, kugeza n'aho uduha Umwana wawe w'ikinege ngo atubere Umukiza n'Umushumba utatuzimiza. Roho Mutagatifu ubakomokaho ni we utumurikira, agasusurutsa imitima yacu, tugakunda tukakurangamira Wowe Mana y'ukuri, Imana ikwiye kuratwa no gukundwa, Imana ikwiye gusingizwa no gushimirwa. Singirizwa ko wadutoye mbere y'igihe, ngo uzatugabire ubugingo bw'iteka. Singirizwa ko wumva amasengesho yacu, ukaduha n'ibidukiza byose. Singirizwa ubugwaneza bwawe, n'impuhwe uhora utugirira. Twakwitura iki, Uhoraho, ibyiza byose dukesha ubuntu bwawe? Dufatanyije amajwi yacu n'ay'abamalayika, tuvuga tuti "Uri Nyir'ubutagatifu, Imana y'ingabo; ijuru n'isi byuzuye ikuzo ryawe. Habwa impundu mu ijuru " Amen. Alleluya.

Isengesho ryo gusabira Papa

Nimucyo dusabire Papa wacu K…
Nyagasani Imana imurinde, nuko imubesheho, imutunganyirize hano munsi, mu makuba ntizamutererane, imurinde n’ibyago byose.
Dusabe
Mana iragira abakristu bose kandi ikabategeka, tugirire ubuntu urebe umugaragu wawe Papa wacu watoreye kuragira Kiliziya yawe. Turagusaba ngo umuhe ijambo riboneye no gutanga urugero rwiza, ayiyoborane ubushishozi, maze azagerane imbaga wamuragije mu bugingo budashira. Ku bwa Yezu Kristu, Umwami wacu. Amen.

Isengesho ryo gusabira Umwepiskopi

Nimucyo dusabire Umwepiskopi wacu K…
Nyagasani Imana imurinde, imubesheho, kandi imuhe imbaraga wo kurangiza neza ubutumwa imuhamagarira, bityo biheshe izina ryayo icyubahiro.
Dusabe
Mana iragira abakristu bose kandi ikabategeka, tugirire ubuntu urebe umugaragu wawe Musenyeri K… watoreye kuragira Kiliziya ya…; turagusaba ngo umuhe ijambo riboneye, no gutanga urugero rwiza, ayiyoborane ubushishozi, maze azagerane imbaga wamuragije mu bugingo budashira. Ku bwa Yezu Kristu, Umwami wacu. Amen.

Isengesho ryo gusabira abashinzwe imirimo ya gitumwa muri Kiliziya

Nyagasani Mana yacu, Wowe ubutumwa bwose buturukaho, fasha Kiliziya guhora ijya imbere no kwamamara mu mahanga yose, wohereze Roho Mutagatifu mu bayoboke bawe, kugira ngo akomeze kudusenderezamo ingabire ze. Turakwinginze, komeza kudutoramo abavandimwe benshi bemera kwitangira imirimo ya gitumwa, kugira ngo Umubiri wa Kristu ukomeze gukura no gusagamba mu ngingo zawo zose. Abashaka kukwiha mu butumwa ubashinga, bahe guhora bakurangamiye Dawe; abo watoye bose, bongerere imbaraga badacogora, bahorane ishyaka, ubutwari n'ubwitange mu mirimo wabahamagariye. Tubisabye ku bwa Yezu Kristu Umwami wacu. Amen.

Isengesho ryo gusaba abasaseridoti n’abandi biyegurira Imana

Nyagasani Yezu, Mushumba mwiza, wazanywe no gushaka kurokora impabe zose, ni na cyo cyatumye urema Isakaramentu ry’ubusaseridoti muri Kiliziya yawe, ngo rijye rikomeza kogeza ako gakiza kawe watuzaniye. Turagusaba dukomeje ngo wohereze abakozi mu murima wawe; Nyagasani, gobora abasaseridoti n’abandi biha Imana muri Kiliziya yawe. Ba ari wowe witorera kandi wihamagarira mu muryango wawe, abo uruzi bakwiye gukora mu murima wawe, ari wo Kiliziya Gatolika Ntagatifu wiremeye. Intore witoreye uzihe gukomeza inzira wazeretse ubutarora inyuma, hoye kugira ababyisukamo utabitoreye, Nyagasani.
Bose:
Turakwinginga Nyagasani, ohereza abakozi mu murima wawe, ari bo twebwe abantu uko tungana. Ubahe kuba umunyu w’isi, kugira ngo imigenzereze yabo myiza ndetse n’imiruho yabo, bitubere itara nk’uko Kiliziya ibitwigisha muri Liturijiya ya Batisimu, ibikuye mu Ivanjili Ntagatifu. Bahe ubwenge nyabwenge, bagire ubugabo bwo kwiyumanganya, bityo bogeze ikuzo ryawe, ingoma yawe bayigwize mu mitima y’abantu. Nibatubere urugero rw’urukundo rudatezuka, bityo bayobore abakwemeye inzira y’ubugingo bw’iteka. Amen.
Mariya, Mugabekazi w’Intumwa, udusabire.

Isengesho ryo gusabira Kiliziya y’u Rwanda

Nyagasani Mana yacu, ku bw’impuhwe zawe watwoherereje Umwana wawe Yezu Kristu ngo tukumenye, tugukunde, utubere Umubyeyi tukubere abana.
Turakwinginze rebana ubugwaneza Kiliziya y’u Rwanda, uyihe guhora yivugurura, ikomeze irangwe n’ubumwe, urukundo n’ubutabera bigukomokaho.
Papa wacu K… n’abepiskopi bose, ubakomeze mu rukundo ; abasaseridoti n’abakwiyeguriye, ubahe gukorera Kiliziya nk’uko ubishaka ; ingo zacu uzihe umugisha : ababyeyi babane mu bwumvikane n’ubudahemukirana, barere abana babo gikristu ; urubyiruko urukomeze mu kwemera ; abasore n’inkumi barusheho kukumvira no kugukunda, Yezu Kristu ababere Inzira, Ukuri n’Ubugingo. Abanyarwanda twese n’abatuye u Rwanda bose, uduhe guharanira amahoro n’amajyambere mu bumwe no mu butabera ; maze twese abana bawe, twisunze Bikira Mariya, twamamaze ingoma yawe y’urukundo.
Tubigusabye ku bwa Yezu Kristu, Umwami wacu. Amen.

Isengesho ryo gusabira abapadiri

Mana ishaka ko abantu bakwemera kugira ngo bakire, turakwinginga; ohereza abapadiri bigishe abantu bawe Inkuru Nziza, babatagatifuze, babayobore mu nzira y’ukwemera. Amahanga yose amenye ko ari wowe Mana Nyakuri, bamenye y’uwo wohereje, Umwana wawe Yezu Kristu.
Nyagasani, turasabira abapadiri bose ngo bagukunde, bagukundishe abantu, maze nibarangiza kugutunganyiriza munsi, bazaze kubana n’Intumwa zawe mu ijuru. Kandi natwe uduhe kudahemukira Roho Mutagatifu twahawe muri Batisimu no mu Gukomezwa, dushyire hamwe na bo mu kurangiza ubutumwa washinze Kiliziya yawe. Ku bwa Yezu Kristu Umwami wacu. Amen.

Isengesho ryo gusabira Paruwasi yacu

Nyagasani Mana yacu, wemeye gushyira ingoro y’Umwana wawe hagati yacu, atubumbira mu muryango umwe w’abakristu ku bwa Batisimu twahawe no ku bw’Ukaristiya dusangira. Kenshi duhurira hamwe tukumva Ijambo ryawe, ridukangurira ubutitsa ugushaka kwawe.
Turagusaba ngo iyi Paruwasi yacu uyikomeze mu kwemera, kandi irusheho gushishikarira ibikorwa by’urukundo n’iby’isohozabutumwa. Duhe gufatanya nk’abavandimwe koko, nta guharirana cyangwa se gutererana abandi. Abapadiri bacu ubongerere ishyaka n’ubutwari, mu mirimo wabashinze yo kudushyikiriza Ijambo ryawe no kudutagatifurisha amasakaramentu. Abashinzwe imirimo inyuranye y’iyogezabutumwa ubakomeze mu kwemera n’urukundo, kandi udutoremo urubyiruko rushishikariye kukwiyegurira no kujyana Ivanjili aho batarayimenya. Imiryangoremezo yacu uyihe kuba ihuriro ry’abakristu, barangwa no gushishikarira ubucengezavanjili mu mibereho yabo ya buri munsi.
Ingo z’abashakanye zirusheho kubahiriza amasezerano yabo, abana babonere ku babyeyi babo urugero rwiza mu mico no mu myifatire bya gikristu. Aboro n’indushyi bitabweho nk’incuti z’Imana, umuryango wacu udashobora kwibagirwa; ingo ziri mu bigeragezo zikwiyambaze ubutitsa; ab’akazuyazi ubakangure, abagutaye bakugarukire, abigishwa babone abakristu babatera inkunga, abapagani bahinduke bafashijwe n’ingabire zawe n’urugero rwiza rw’ababatijwe. Abasore n’inkumi birinde ubwomanzi, bashishikarire amatwara y’ingoma yawe, kandi bitegure kuzashingira ingo zabo ku bukristu n’amajyambere abereye igihugu cyacu na Kiliziya. Maze rero twese, Nyagasani, uduhe amahoro n’ubwumvikane mu bwubahane no mu gufashanya, kugira ngo dushyire hamwe twubake ingoma yawe y’urukundo. Nuko umunsi umwe buri wese mu bagize iri koraniro ryacu, dufashijwe na Bikira Mariya Mutagatifu, Umubyeyi w’abemera, azatahukane ihirwe ryo kubana nawe iteka ryose. Amen.

Isengesho ryo gusaba amahoro

Nyagasani, Yezu Kristu, wabwiye intumwa zawe uti " Mbasigiye amahoro mbahaye amahoro yanjye ", turakwinginze, Kiliziya yawe uyihe amahoro ku isi yose, kandi wowe Mwami w'amahoro, uyigire ihuriro ry'ubwumvikane bw'imiryango, uyirumbutsemo inkunzi zitabarika z'amahoro, bayamamaze mu mvugo no mu ngiro badatinya umunaniro n'ibitotezo, ibigeragezo n'ubutiriganya.Komeza ubutwari bw'abaharanira ubusugire bwa bagenzi babo, barangamiye umunezero wa buri muntu. Twese uturinde kwironda no kwikunda by'agakabyo, ahubwo dushimishwe no kugukurikira mu nzira wanyuze udushakira amahoro n'umukiro.
Abategetsi bacu ubahe kunyurwa n'amahoro yawe, abe ari yo bagira umugambi mu bikorwa byabo, bayoborane ubwitange abo wabaragije, bashaka kugeza buri wese ku bwigenge n'amajyambere byuzuye. Kura inzika n'inzangano mu mitima y'abantu, uhashye urugomo n'ubushyamirane mu mibanire yabo, maze bakurizeho kugusingiza wowe soko y'imigisha n'amahoro. Ku bwa Yezu Kristu, Umwami wacu. Amen.

Cyangwa

Isengesho rya Mt. Fransisko wa Asizi
Nyagasani,
ngira umugabuzi w' amahoro yawe,
Ahari urwango mpashyire Urukundo
Ahari ubushyamirane, mpashyire kubabarirana
Ahari amacakubiri mpashyire ubumwe,
Ahari ukuyoba mpashyire ukuri
Ahari ukujijinganya mpashyire ukwemera
Ahari ukwiheba mpashyire ukwizera
Ahari icuraburindi mpashyire urumuri
Ahari agahinda mpashyire ibyishimo
Nyagasani
Aho gushaka guhozwa, njye mpoza abandi
Aho gushaka kumvwa njye numva abandi
Aho gushaka kwikundisha, njye nkunda abandi
Kuko utanga ari we uhabwa
Uwiyibagirwa ari we uronka
Ubabarira, ni we ubabarirwa
Uhara amagara ye ni we uzukira ubugingo bw' Iteka
Amen!

Isengesho risaba ubumwe bw'abakristu

Nyagasani Yezu, uraye uri budupfire, wasabiye abigishwa bawe ngo babe umwe byuzuye nk'uko uri umwe n'Imana Data, n'Imana Data akaba umwe nawe, dufashe kwiyumvisha ubuhemu buri mu bwitandukanye bwacu.
Duhe ubwitonzi bwo gushishoza n'imbaraga zo guhashya icyaha kitwihishemo, ari icy'ubwirasi cyangwa agasuzuguro, n'urwango mu bavandimwe. Duhe guhurira muri Wowe, kugira ngo mu mitima yacu no mu minwa yacu, humvikane ubudahwema isengesho ryawe risaba Ubumwe bw'abakristu, mbese nk'uko ubyifuza no mu buryo ubishaka.
Wowe Rukundo nyakuri, dufashe kukubonamo inzira ituyobora ku Bumwe, tubikesheje icyubahiro duha Izina ryawe n'Ukuri kwawe. Amen.

Isengesho ryo gusaba ubutabera

Mana yacu, Wowe Mucamanza w'ukuri w'iyi si, Wowe utabara kandi nturenganye, Umwana wawe yajujubijwe nta mpamvu, yuhirwa ibinyobwa bisharira, abura umuhoza mu mibabaro ye, atereranwa na bose mu gibe yadupfiraga. Ni Wowe wenyine yiringiye, igihe yishyize mu maboko yawe.
None Dawe, girira Umwana wawe, urebane impuhwe abanyantege nke bose, utabare abagirirwa nabi bazira akarengane, uhoze abarizwa n'urukundo ruke mu bantu, ubabarire abashavuzwa n'inabi bagirirwa, wumve imiborogo y'abari mu ntambara n'ugutabaza kw'abatotezwa n'abanyamaboko. Gorora imitima yapfukiranywe n'umwijima w'ubugome, uyiyobore mu rumuri rw'urukundo, twese twitabire kubahiriza uburenganzira bw'ikiremwamuntu. Humuriza abafungirwa ubusa n'abacirwa imanza z'amahugu.
Nyagasani, utubabarire kuko kenshi twihakanye abavandimwe bacu, tukicecekera kandi tuzi ukuri kwabarengera. Utubabarire ko kenshi abakene twabahungije amaso ngo tutabona imibabaro yabo, tugahitamo k wikanyiza aho gusangira ibyiza waduhaye. Utubabarire ubwoba dukunda kugira, twanga kwiteranya, bityo tukakwihakana mu ishusho ry'abo wiguranye ubacungura. Yezu waciriwe urubanza n'abantu, ugakizwa n'Imana ishobora byose, duhe kukubonamo umurengezi wacu w'igihe cyose ; Wowe ubana n'Imana Data, mu bumwe bwa Roho Mutagatifu, uko igihe bihora bisimburana iteka. Amen.

Isengesho ryo gusabira abigishwa

Nyagasani Mana, Mutegetsi wacu, wowe uhamagara abantu bose, ukabatorera mu Mwana wawe Yezu Kristu ngo ubahe ubugingo bw'iteka, umaze kubatagatifurisha ingabire y'igitambo cye gitagatifu; turakwinginze ngo urebane impuhwe abigishwa bacu, wugurure amatwi y'umutima wabo bakire Inkuru Nziza y'Umwana wawe. Bahe ukwemera kubayobora ku iriba rya Batisimu, bavuke bundi bushya, bagirirwe imbabazi z'ibyaha byabo, maze babe ingingo nzima z'umubiri wa Kristu.
Mana ishobora byose igahoraho iteka, wowe urumbukisha Kiliziya yawe abana bashya ubudahwema, ukomeze utubure ukwemera n'ubujijuke mu bigishwa bacu. Nibamara kuvuka ubwa kabiri mu iriba rya Batisimu, babarirwe mu ntore wihitiycno. Urugero rwiza rwacu twese ababatanze kubatizwa rubakomeze, kandi dufatanye na bo kwamamaza izina ryawe dukesha umukiro w'iteka. Tubigusabye ku bwa Yezu Kristu Umwana wawe n'Umwami wacu, mubana mugategekana mu bumwe bwa Roho Mutagatifu, mukaba Imana iteka ryose. Amen.

Isengesho ryo gusabira abaguye

Mana y'urukundo n'impuhwe, wowe ushaka ko twese dukizwa no gukurikira inzira twerekwa n'Umwana wawe Yezu Kristu, rebana ibambe abo yacunguje Amaraso ye Matagatifu, bakaba baraciye ukubiri n’amasezerano yabo ya Batisimu. Batere umwete wo kukugarukira, kugira ngo bareke gukomeza kurangazwa n'imibereho y'ubu buzima buhita. Bahe guhugukira umukiro w'ubugingo bw'iteka, bakesha umushumba uragira ntazimize, Yezu Kristu Umwana wawe n'Umwami wacu, We mubana mugategekana mu bumwe bwa Roho Mutagatifu, mukaba Imana iteka ryose. Amen.

Isengesho ryo gusabira abapagani

Mana ishobora byose igahoraho iteka, wowe waremye abantu bose ubafitiye umugambi wo kubakiza, fasha abatarakumenya kugushakashakana umutima utaryarya ; bamurikiwe na Roho wawe Mutagatifu bakorere mu maso yawe ibitunganye, mu makuba no mu byago byabo basanganirwe n'impuhwe zawe, amayira banyuramo y'iyi si bayahuriremo n'ingero nziza z'abakwemera, maze bakurizeho kumenya ko ari wowe Mana y'ukuri, Imana y'urukundo n'Umubyeyi w'abantu bose. Ku bwa Yezu Kristu, Umwami wacu. Amen.

Isengesho ryo gusabira igihugu, Akarere, Umugi

Mana yacu, wowe ugena byose mu bugenge butangaje, gira impuhwe wakire amasengesho tuguturiye igihugu cyacu (Akarere, Umugi wacu...), kugira ngo umuryango wawe ujijuke kandi ukuyoboke, maze ujye mbere mu mahoro n'ubutabera. Ku bwa Yezu Kristu, Umwami wacu. Amen.

Isengesho ry’abitegura gushinga urugo

Mana waremye umugabo n’umugore, wifuza ko abashakanye bakundana kugeza gupfa; mfasha guhitamo uzaba mugenzi wanjye tuzafatanya ibyishimo n’imiruho by’ubu buzima. Dufashe kumenyana no kubahana, udutoze kujya inama no gushakira hamwe imigambi izateza urugo rwacu imbere. Maze tuzafatanye kugukorera, tuzakubyarire abana bizihiye igihugu na Kiliziya yacu. Ibyo tubigusabye ku bwa Yezu Kristu Umwami wacu. Amen.

Isengesho ryo gusabira ingo z'abashakanye.

Nyagasani Mana yacu,
Watagatifuje umubano w’abashakanye,
Ubwo waremaga umugabo n’umugore,
Ukabashinga kubana no kubyara.
Mu isakaramentu ry’ugushyingirwa,
Watanze urugero rw’Urugo Rutagatifu rw’i Nazareti
Wongera kugena ko umubano w’abashakanye
Ushushanya urukundo rwa Kristu na Kiliziya ye.
Turasabira ingo z’abashakanye kubana neza,
Izifite ibibazo zibonere ibisubizo muri Kristu,
No mu nama nziza z’abifuza kuzifasha kubana neza,
Bashinga imizi mu rukundo no mu budahemuka.
Nyagasani Yezu,
Wowe warerewe mu Rugo Rutagatifu rwa Yozefu na Mariya,
Ha ingo zose ukwemera,ukwizerana n’ugukundana,
No kurera abana babo bashingiye ku Ivanjili.
Ha abashakanye gusubira kenshi ku isoko y’isezerano ry’ugushyingirwa bagiranye, Bamenye koroherana no kubabarirana,
Kandi banabitoze abana wabahaye,
Maze bose bashimishwe no gusabana mu rukundo rwawe.
Nawe Bikiramariya na Yozefu batagatifu,
Mudusabire kandi mumurikire ingo zacu,
Zose zirangwe n’ubusabanira-Mana.
Ibyo tubigusabye ku bwa Yezu Kristu Umwami wacu. AMINA.

Isengesho ryo gusabira ingo

Mana Data, ni wowe washatse ko Umwana wawe avukira mu rugo rumeze nk'izindi zose kandi akarukuriramo. Mu mibereho isanzwe y'urugo yabanye na Mariya na Yozefu, maze bamutoza imico nyayo, kandi bamufasha kugenda arushaho gusobanukirwa n'ubutumwa ashinzwe ku isi. Nuko rero Dawe, turakwinginze, uhe ingo ziriho muri iki gihe gusugira, kunga ubumwe no gushinga imizi ihamye. Uhe buri muntu mu bazituye gusagamba mu byishimo byo kumva ari kumwe n'abandi, kandi anogerwe no kubagirira imbabazi. Fasha ingo zose gutega amatwi amajwi y'abaziyambaza, no kwihutira kubakirana urugwiro. Mana Data, wowe Nyir'ubuntu butagira urugero, rebana impuhwe ingo zose ziri mu ngorane z'indwara, urupfu, ubwumvikane buke n'ubutandukane, abazituye ubahe kukwemera no kukwizera, maze bakurizeho na bo ubwabo kwizerana. Ufashe buri rugo kwakira Roho Mutagatifu wawe, no kwemera buri munsi kuyoborwa na We, maze ingo zose zibe ishingiro rya Kiliziya n'isoko y'amajyambere nyakuri. Ku bwa Yezu Kristu, Umwami wacu. Amen.

Isengesho ryo gusabira abana n'urubyiruko

Nyagasani,
Tugutuye abana n'urubyiruko b’isi yose,
Ubahe gukurana urukundo,
Bakumenye banagukunde,
Bakumenyeshe urungano.
Barinde ingeso mbi zose,
Bazire kwangana no kurwana,
Kwirogesha ibiyobyabwenge,
Kuzerera no kubahuka,
Gusuzugura ababarera,
Gusambana no kubeshya,
Kwiba no kwangiza.
Wowe soko y’ingabire,
Bahe kujijuka no gushishoza,
Bakire imico ubatoza,
Bagutunganire igihe cyose.
Bahe imbaraga bakugane,
Bagusingize uko bukeye,
Isi yacu inogere Imana,
Ku bwa Yezu Kristu Umwami wacu. Amina

Isengesho ryo gusabira u Rwanda

Nyagasani, Mana yacu, uri Urumuri rw'ibihugu byose, ni wowe ubibeshaho, ukabicira urubanza, ukabikiza. Twese hamwe turakwambaza dusabira u Rwanda rwacu. Nyagasani, tugushimiye ibyo turukesha byose, kuko ari wowe biturukaho. Tugushimiye ibyiza byarwo, ubutaka bwarwo, ururimi n'amateka byarwo. Tugushimiye imico myiza y'igihugu cyacu, ubugwaneza bw'ababyeyi, umwete w'urubyiruko, imirimo y'abahinzi n'iy'abandi bose baruhira amajyambere.
Dawe, turagije u Rwanda rwacu ubuntu bwawe, ururinde, ururengere. Ha abana barwo bose ubutwari bwo kuruzamura mu mahoro, mu mudendezo no mu gushyira hamwe ; bahe kwigira inama nziza yo gushaka ikuzo ryawe, kuruta iryarwo n'iryabo. Turasabira abategetsi n'abacamanza bacu, kugira ngo imigenzereze yabo iduhe amahoro n'ituze, mu Iyobokamana rihamye no mu bwangamugayo. Byutsa muri twe abantu bashishoza, bataryarya, b'umurava kandi b'intwari. Ijambo ryawe n'urukundo rwawe biturinde gutandukana, bidutoze kumvikana no gushyira hamwe nk' abavandimwe.
Ha u Rwanda umubano mwiza n'amahanga ; ururinde intambara n'imidugararo yose ; uruhe guteza amahoro n'ubwumvikane mu bihugu by'Afurika n'iby'isi yose. Murikira abakristu bose b'i Rwanda kandi ubakomeze, kugira ngo bamamaze ukuri kwawe kandi bimirize imbere ubutabera n'urukundo bya kivandimwe, bizatuma abaturage bose bakumvira kandi babona umunezero nyawo. Mana yacu Nyir'impuhwe kandi Nyir'ibambe, kingura imitima y'abanyarwanda bose kugira ngo bamenye Yezu Kristu, Umwana wawe n'Umwami wacu, ari na we Mukiza w'amahanga yose n'uw'abantu bose. Amen.

Isengesho ryo gusabira umukuru w’igihugu

Mana yacu, Wowe ugaragirwa n’ubutegetsi bwa bene muntu, umugaragu wawe K… muhe kugira ishya mu mirimo y’ubukuru yahawe, azajye ahora abuguheramo icyubahiro no kukunyura, kandi n’igihugu yashinzwe ahore ahihibikanira kukirumbutsamo ituze, akirikomezemo. Ku bwa Yezu Kristu, Umwami wacu. Amen.

Isengesho ryo gusabira abarwayi

Nyagasani Mana yacu, Washatse ko Umwana wawe w'ikinege yigerekaho imibabaro yacu, ugira ngo wereke abantu agaciro k'ububabare n'ako kwiyumanganya ; gira impuhwe wumve amasengesho tuvuga dusabira abavandimwe bacu barwaye. Maze abazahajwe n'ububabare, ubumuga,. izabukuru cyangwa se izindi ndwara, ubahe kwiyumvisha ko babarirwa muri babandi bitwa abahire, kandi bamenye ko bunze ubumwe na Kristu, wemeye kubabara kugira ngo akize abantu. We mubana mugategekana mu bumwe bwa Roho Mutagatifu, uko ibihe bihora bisimburana iteka. Amen.

cyangwa:

Mana ishobora byose igahoraho iteka, Wowe mukiro uhoraho w'abakwemera, umva amasengesho tuvugira abayoboke bawe barwaye, ari na bo dusabira dutakambira impuhwe zawe ngo ubatabare ; maze nibamara kugarura ubuyanja , bazaze kugushimira muri Kiliziya yawe.
Ku bwa Yezu Kristu Umwana wawe n'Umwami wacu, Imana mubana mugategekana mu bumwe bwa RohoMutagatifu, uko ibihe bihora bisimburana iteka. Amen.

Isengesho ryo gusabira umwana urwaye

Bikira Mariya, wowe uzi urugero rw'agahinda k'umubyeyi ureba umwana we ababaye, ndagira ngo wite kuri uyu mwana wanjye urwaye. Ndamugushinze kuko nkwizeye, Mubyeyi ugira ibambe, ndakwiyambaje ngo umusabire yoroherwe kandi akire. Ku bwa Yezu Kristu Umwana wawe n'Umwami wacu. Amen.

Isengesho ry'umugore utwite

Mana yanjye, wahaye umugisha urukundo rwacu maze vuba aha nkazakubyarira akana. Twagushimira dute? Wowe ukunda abana, uhe umugisha uyu waremeye kuragirwa nanjye, tukaba tumugutuye aho tuboneye ko tugiye kuzamubyara. Nyagasani ndamukuragije azakubere umwana ukunda. Azagire uburanga bwa Yezu, umutagatifuze, nanjye ntagatifuza, untoze kurushaho gukunda kugira ngo umwana wanjye twunze ubumwe atangire ayoboke umurage wawe. Wowe uzi icyo uyu mwana agenewe, uzi umurimo wowe uzamushinga kuri iyi si, muhe kuzawutunganyiriza mu ikuzo ryawe, no kuzagirira akamaro abandi bantu, natwe tuzabyishimire. Nawe Mubyeyi Mariya, umurinde kandi ukomeze no kurengera urugo rwacu. Ku bwa Yezu Kristu Umwami wacu. Amen.

Isengesho ryo gusaba gupfa neza

Nyagasani, Mana y'impuhwe, wahanze byose, uremera abantu kubakiza no kubabeshaho iteka, utwiteho twe abakwiyambaza. Nyagasani, dukomeze muri ubu buzima, maze igihe tuzaremba tuzapfe nta nenge y'icyaha dufite, abamalayika bawe badusohoze kuri wowe watwiremeye.
Yezu Mukiza wacu, turagutakambira ngo uduhe kwicuza ibyaha byacu tukiriho, uturinde urupfu rudutunguye, duhabwe impamba y'abari mu rugendo bakugana, tuzapfe tuvuga izina ryawe ritagatifu, irya Bikira Mariya Umubyeyi wawe n'uwacu n'irya Yozefu Mutagatifu.
Yezu, Mariya na Yozefu, mbashinze umutima wanjye n'amagara yanjye.
Yezu, Mariya na Yozefu, muramfashe ninjya gupfa.
Yezu, Mariya na Yozefu, icyampa ngo nzapfe turi kumwe. Amen.

Isengesho ryo gusabira abari mu rugendo

Mana ishobora byose, menya abana bawe bari mu rugendo, ubarinde ibyago byose, ari iby'impanuka, uburangare no kutakwitaho ; maze urwo rugendo bagiyemo ruzabagirire akamaro kandi barutahukemo amahoro, tuzongere kugira ihirwe ryo guhura no kubana. Tubigusabye ku bwa Yezu Kristu, Umwami wacu. Amen.

Isengesho ryo gusabira abitabye Imana

Yezu ugwa neza, girira ibyuya by'amaraso watutubikaniye i Getsemani, maze ubabarire abacu bapfuye.
Yezu ugwa neza, girira ko wababaye bagukubita, maze ubabarire abacu bapfuye.
Yezu ugwa neza, girira ko wababaye bagutamiriza ikizingo cy'amahwa, maze ubabarire abacu bapfuye.
Yezu ugwa neza, girira ko wababaye uhetse umusaraba ujya ku musozi wa Kaluvariyo, maze ubabarire abacu bapfuye.
Yezu ugwa neza, girira ko wababaye bakubamba ku musaraba, maze ubabarire abacu bapfuye.
Yezu ugwa neza, girira inyota n'ububabare byakurembeje ku musaraba, maze ubabarire abacu bapfuye.
Yezu ugwa neza, girira ko wababaye upfira ku musaraba, maze ubabarire abacu bapfuye.
V. Nyagasani, ubahe iruhuko ridashira.
R. Maze ubiyereke iteka, baruhukire mu mahoro..

Isengesho ryo gusubira roho zo muri purgatori

Yezu Nyir'impuhwe zitagira urugero, wowe ugurumanamo urukundo rwa roho ziri muri purgatori, turakwinginga ngo ugirire isamba ry'Umutima wawe Mutagatifu n'imibabaro y'Umubyeyi wawe utagira inenge, ukirishe amaraso yawe abanyabyaha bo ku isi basamba kandi bagomba kwitaba Imana uyu munsi. Mutima wasambye wa Yezu, babarira abageze igihe cyo gupfa. Amina!

(Iri sengesho turikesha Mariya Simma wari warahawe ingabire yo kuvugana na roho zo muri purgatori; ni we ubwe wiyumviye zigira ziti "Abantu baramutse bavuze mu gitondo na nimugoroba isengesho riduhesha indurgensiya bakagerekaho "Ndakuramutsa Mariya" eshatu zivugiwe abitaba kuri ayo manywa no muri iryo joro, bakiza roho nyinshi umuriro w'iteka".)

Isengesho ryo gusabira abatwanga

Mana y'urukundo n'amahoro, abatwanga bose ubakize ibyago byabo, natwe ariko uturinde imitego y'inzangano, kubacira urubanza no kubifuriza nabi, ahubwo uduhe kwigorora no kubana gikristu. Amen.

Isengesho ryo gusaba gukundana

Mana ituma byose bigirira akamaro abagukunda, shyira mu mitima yacu urukundo rwawe rudatezuka, kugira ngo ibitekerezo uduha bidahinduka. Ku bwa Yezu Kristu Umwami wacu. Amina.

Isengesho ryo gusaba umucyo

Nyagasani, wowe wakuyeho igihano cy'umwuzure ubitewe n'urukundo ufitiye abantu, turagusaba tukwizeye ngo uduhe umucyo w'izuba, rikure ububore n'uruhumbu mu myaka wageneye gutunga ubuzima bwacu, kandi muri uwo mucyo n'uburumbuke, natwe tubonereho gusingiza urukundo rwawe rudususurutsa iteka ryose. Amen.

Isengesho ryo gusaba imvura

Nyagasani, wowe utuma turamuka ukatubeshaho ukatudabagiza, uduhe imvura idukijije, maze nitumara kuramirwa n'ubuntu bwawe, tugire umwete wo kwizera iby'ijuru. Ibyo tubigusabye ku bwa Yezu Kristu, Umwami wacu. Amen.