Andi masengesho ya bikira mariya
Turakuramutsa Mwamikazi Nyir'ibambe
Uri isugi, Uri Imanzi
Ndakuramutsa Nyenyeri yo ku nyanja
Isengesho ryo kwiyegurira Bikira Mariya
Isengesho ryo kwiyegurira Bikira Mariya utasamanywe icyaha
Isengesho ryo kwiyambaza Bikira Mariya wa Kibeho
Ibisingizo bya Bikira Mariya
ANDI MASENGESHO YA BIKIRA MARIYA
Mubyeyi Mutagatifu w’Imana
Mubyeyi Mutagatifu w’Imana, turaguhungiraho ngo uturengere, ntusubize inyuma amaganya tukuganyira mu bukene bwacu, maze amakuba duhorana uyadukize, Mubikira wasanganywe icyubahiro, ukwiye gusingizwa. Amen.
Turakuramutsa Mwamikazi Nyir’ibambe
Turakuramutsa Mwamikazi Nyir’ibambe, turakuramya wowe utubeshaho, ukadushimisha, ugatuma twizera. Twebwe impabe bene Eva turagutakambira duhagaritse umutima, turakuganyira dufite intimba kuko tukiri ahantu h’ibyago. None rero, muvugizi wacu utwiteho, utugirire ibambe kandi nitumara guhabuka, uzadusohoze kuri Yezu Umwana wawe wubahwa, Bikira Mariya Nyir’ibambe utunganye, ugatuza.
V.: Mubyeyi Mutagatifu w’Imana urajye udusabira.
R.: Tubone guhabwa ibyo Yezu Kristu yadusezeranyije.
Dusabe
Mana, mirukiro yacu ni wowe udukomeza, wite ku bawe bagutakira ubagirire ibambe; Mariya Umubyeyi w’Imana, Umubikira wubahwa utasamanywe icyaha, na Yozefu Mutagatifu umugabo we, n’intumwa zawe Petero na Pawulo batagatifu, n’Abatagatifu bose baduhakirwe. Nyagasani Nyir’ibambe, ita ku masengesho yacu yo kugira ngo abanyabyaha bakire na Kiliziya Ntagatifu idutegeka yigenge kandi yubahwe. Ku bw’uwo Yezu Kristu, Umwami wacu. Amen.
Uri isugi, uri imanzi
Uri isugi, uri imanzi, uri umuziranenge, uri mwiza we Mariya; wowe wagizwe irembo ribengerana ry’ijuru! Yewe Mubyeyi w’ikuzo Kristu akunda cyane, akira akaririmbo k’icyubahiro n’ibisingizo. Icyaduha ngo umutima n’umubiri byacu bibe ibiziranenge na byo, ni cyo ururimi n’umutima wacu ugukunda bigusabye ubu ngubu. Dore ihirwe ryo kuzahora tukubwira uturirimbo twiza iteka ryose; wowe Mugwaneza, wowe Mwamikazi, wowe wenyine Mariya wagumirije kuba isugi. Amen.
NDAKURAMUTSA NYENYERI YO KU NYANJA
Ndakuramutsa, Nyenyeri yo ku nyanja, Mubyeyi mutagatifu w'Imana, mubyeyi wagumirije kuba isugi, Rembo rihire ry'ijuru. Akira iyi ndamutso nk'uko wakiriye iya Gaburiyeli... udukomeze mu mahoro, udukureho izina twasigiwe na Eva. Bohora imbohe, uhe impumyi kubona : dukize ibyago, amasengesho yawe aturonkere ibyiza nyakuri. Twereke ko uri umubyeyi wacu, kandi amasengesho yacu uyasohoze ku uwemeye kuba umwana wawe agira ngo atuvukire. Mubikira utagereranywa, nyir'umutima wuje ituze, dukize icyaha, uduhe umutima utuza kandi wuje ubumanzi. Turonkere inema yo kubaho mu buziranenge; tuyobore mu nzira nyayo kugira ngo tuzasangire ibyishimo by'iteka turangamiye Yezu. Imana Data niharirwe ibisingizo, icyubahiro gihabwe Yezu Kristu usumba byose, hamwe na Roho Mutagatifu, Ubutatu butagatifu busingirizwe hamwe. Amen.
Isengesho ryo kwiyegurira Bikira Mariya
Mariya Mubyeyi w’Imana, Muheshanema n’Umugabekazi w’isi n’ijuru, urukundo ngufitiye ni rwo runteye kukwegera nonaha. Kuva uyu munsi jyewe… ndakwihaye, nkweguriye umubiri wanjye n’umutima wanjye n’umutungo wanjye wose; nkwihanye ibyishimo byuje umutima ngo ungenze uko ushaka. Ndakwinginze wemere ubane nanjye, maze unyigishe kwakira Yezu mu mutima wanjye; bana nanjye, unyigishe inzira yo kwiyoroshya n’iy’urukundo. Mubyeyi nkunda, ngusezeranyije guhora nkumvira, ndashaka kwirinda icyaha nkomeje kugira ngo ntagushavuza. Niyemeje gukurikiza inama Ivanjili ingira. Ariko rero, Mubyeyi ugira ibambe, uzi intege nke zanjye, ngusabye kumpora hafi igihe cyose, kugira ngo untere imbaraga nshobore gutunganya uwo mugambi. Mu byishimo n’amahirwe nzagumya kugusingiza, mu byago n’amakuba nziringira ubuvugizi bwawe.
Ndakwiyeguriye, Mariya, kandi nkwemereye kugira ubuziranenge n’ubupfura, ubutabera n’urukundo rukomeye muri bagenzi banjye. Wowe washyingujwe ingabire, ngutuye abakristu bose, maze ubuziranenge bwawe buhore babuvugurura.
Mubyeyi w’Umukiza, nizigiye impuhwe ugirira abana bawe. Urandonkere imbabazi kandi uzangoboke ku munsi w’urupfu, maze uzambere inzira ingeza aho Umwana wawe yateguriye abamwemera bose. Amen.
Isengesho ryo kwiyegurira Bikira Mariya Utasamanywe icyaha
Uutasamanywe icyaha,
Mwamikazi w'Ijuru n'isi,
Buhungiro bw'abanyabyaha n'Umubyeyi ukunda byimazeyo abana yarazwe,
Uwo Imana yashatse kurindisha imirimo y'Impuhwe Ze,
Ngaha ndaje munsi y'ibirenge byawe, jye (Kanaka ... ) w'umunyabyaha.
Ndakwinginze, nyemera wese nk'igikoresho cyawe wigengaho ;
unkoremo ibyo wifuza, muri roho no mu mubiri, mu buzima bwanjye, igihe nzapfira, ndetse n'ubuzima bwanjye buzira iherezo.
Mawe, ubanze ungenze uko ushaka, kugirango ibyaguhishuweho, ngo : "Umugore azahonyora umutwe w'inzoka" kandi ngo : "Wowe wenyine uzatsinda itana muby'Iyobokamana mu isi yose", bishyire bitahe.
Mpa kuba igikoresho kikunogeye kikabera ibiganza byawe bitagatifu byuzuye Impuhwe, mu bikorwa by'urukundo, maze mbashe gukangurira iby'Ijuru roho z'akazuyazi cyangwa se izatannye. Bityo ingoma y'Umutima Nyamana wa Yezu Kristu isakare ku isi hose nta nkomyi.
Ni koko, kuza udusanga bitwegereza inema zihindura kandi zigatagatifuza roho z'abanyabyaba, kuko Ingabire ziva mu Mutima Nyamana wa Yezu zikadutwikira twese, zinyuze mu Biganza byawe bya kibyeyi. Amina!
Isengesho ryo kwiyambaza Bikira Mariya wa Kibeho
Bikira Mariya Nyina wa Jambo,Mubyeyi w’abamwemera Bakamwakira,
dore twishyize imbere yawe tukurangamiye.
Twemera ko uri kumwe natwe nk’umubyeyi mu bana be,
N’ubwo tutakubonesha amaso yacu y’umubiri.
Wowe nzira nziza igera kuri Yezu Umukiza,
Tugushimiye ibyiza byose tugukesha mu kubaho kwacu,
Cyane cyane kuva ubwo, mu kwicisha bugufi kwawe,
Wemeye kwigaragariza i Kibeheho by’agatangaza
Mu gihe iyi si yacu yari ibikeneye cyane.
Komeza uduhe urumuri n’imbaraga,
Tubashe kwakira uko bikwiye ubutumwa bwawe
Budushishikariza guhinduka no kwihana
Ngo tubeho dukurikiza Ivanjili y’Umwana wawe.
Dutoze gusenga nta buryarya no gukundana nk’uko yadukunze;
Maze nk'uko wabisabye, duhore turi indabo nziza zihumurira bose na hose.
Bikira Mariya Umunyamibabaro,
Duhe kumva agaciro k’umusaraba mu buzima bwacu,
Maze ibyari bibuze ku mibabaro ya Kristu,
Tubyuzurize mu mibiri yacu tubigirira Umubiri we, ari wo Kiliziya.
Nuko niturangiza urugendo rwacu hano ku isi,
Tuzabane namwe mu ngoma y’ijuru ubuziraherezo,
Amen.
IBISINGIZO BYA BIKIRA MARIYA
Nyagasani utubabarire
Kristu utubabarire
Nyagasani utubabarire
Kristu utwumve
Kristu utwiteho
Mana Data Nyir'ijuru, utubabarire
Mana Mwana wakijije abantu, utubabarire
Mana Roho Mutagatifu, utubabarire
Butatu Butagatifu uri Imana imwe, utubabarire
Mariya Mutagatifu, udusabire
Mariya Nyina wa Jambo, udusabire
Mubyeyi Mutagatifu w'Imana. udusabire
Mubyeyi wa Yezu Kristu, udusabire
Mubyeyi w'Umuremyi, udusabire
Mubyeyi w'Umukiza, udusabire
Mubyeyi wa Kiliziya, udusabire
Mubyeyi inema z'Imana ziturukaho, udusabire
Mubyeyi utagira inenge, udusabire
Mubyeyi utigeze urarikira ikizira, udusabire
Mubyeyi wagumirije kuba isugi, udusabire
Mubyeyi utigeze uhinyuka, udusabire
Mubyeyi ukwiye gukundwa, udusabire
Mubyeyi utangaza, udusabire
Mubyeyi ugira inama nziza, udusabire
Mubikira wahebuje ababikira bose, udusabire
Mubikira witonda cyane, udusabire
Mubikira ukwiye kubahwa, udusabire
Mubikira ukwiye gusingizwa,udusabire
Mubikira utavuguruzwa, udusabire
Mubikira ugira ibambe, udusabire
Mubikira udahemuka, udusabire
Uhunzwe ingeso nziza zose, udusabire
Ubwiriza ibinyura Imana, udusabire
Utuma twishima, udusabire
Mushyinguzwa w'ibya Roho Mutagatifu, udusabire
Mushyinguzwa ukwiye kubahwa, udusabire
Mushyinguzwa waheranije mu kuzigamira Imana, udusabire
Umeza nka Roza iribagiza, udusabire
Umeze nk'urugerero rwa Dawudi, udusabire
Umeze nk'urugo ruharaze amahembe y'inzovu, udusabire
Umeze nk'inzu yubakishije zahabu, udusabire
Umeze nk'ubushyinguro bw'amasezerano y'Imana, udusabire
Umeze nk'irembo ry'Ijuru, udusabire
Umeza nk' inyenyeri yaka izuba rigiye kurasa, udusabire
Ukiza abarwayi, udusabire
Mirukiro y'abanyabyaha, udusabire
Umara intimba abayifite, udusabire
utabara abakristu, udusabire
Mwamikazi w'Abamalayika, udusabire
Mwamikazi w'Abasokuruza, udusabire
Mwamikazi w'Abahanuzi, udusabire
Mwamikazi w'Intumwa, udusabire
Mwamikazi w'Abahowe Imana, udusabire
Mwamikazi w'Abemeye Imana, udusabire
Mwamikazi w'Ababikira, udusabire
Mwamikazi w'Abatagatifu bose, udusabire
Mwamikazi Utasamanywe icyaha cy'inkomoko, udusabire
Mwamikazi wajyanywe mu ijuru, udusabire
Mwamikazi waduhaye Rozali Ntagatifu, udusabire
Mwamikazi w'Afurika, udusabire
Mwamikazi w'i Kibeho, udusabire
Mwamikazi uduha amahoro, udusabire
Ntama w'Imana wowe ukiza ibyaha by’abantu, udukize Nyagasani
Ntama w'Imana wowe ukiza ibyaha by’abantu, utwiteho Nyagasani
Ntama w'Imana wowe ukiza ibyaha by’abantu, utubabarire
Mubyeyi Mutagatifu w'Imana urajye udusabira,
Tubone guhabwa ibyo Yezu Krist yadusezeranije
DUSABE:
Nyagasani Mana yacu, turagusaba twe abawe, uduhe guhorana ubuzima bw’umutima n’ubw’umubiri, maze ku bw'amasengesho ya Mariya Mutagatifu, Umubikira iteka, tubone gukira agahinda kariho kuri ubu, no kuzishima iteka mu ijuru. Kubwa Yezu Kristu Umwami wacu. Amen.