Batisimu

IMIHANGO Y’ISAKRAMENTU RYA BATISIMU

A) BATISIMU Y’ABANA BATO
(reba Igitabo cy’Umukristu, pp.172-179).

Umuhango usanzwe wa Batisimu

Umusaserdoti aramutsa abateraniye aho, ababyeyi b’umubiri n’aba Batisimu ndetse n’inshuti zose zabaherekeje. Mu magambo make, Umusaserdoti abibutsa ibyishimo byo kubona umwana ho impano y’Imana. Imana ni yo soko y’ubuzima bwose.

Umusaserdoti abaza ababyeyi b’umwana ibi bibazo nabo bakamusubiza baranguruye ijwi. Iyo ari abana benshi, ababyeyi bashobora kubarizwa hamwe bose bagasubiriza rimwe.

V.: Mbese babyeyi, uyu mwana mwabyaye mwahisemo kumwita irihe zina?
R.: K. cyangwa N.
V.: K. cyangwa N. uyu, muramusabira iki mu Muryango w’Imana ar wo Kiliziya?
R.: Batisimu imuha kuvuka muri Kristu.
V.: Mwaje kubatirisha abana banyu: murabona umurimo mwiyemeje wo kubatoza ukwemera Kristu Kiliziya yamamaza, kugira ngo nibakurikiza amategeko y’Imana bizatume bayikunda kandi bakunde mugenzi wabo nk’uko Kristu yabitwigishije. Mbese muriyumvisha neza uwo murimo?
R.: Yee, turawiyumvisha.
V.: Namwe babyeyi ba Batisimu, murabona muzashobora gufasha ababyeyi b’aba bana kurangiza neza umurimo wo kubarera gikristu?
R.: Yee, turabona tuzawushobora.

Ubatiza aravuga ati:
Babyeyi, abana mwazanye kubatizwa, umuryango w’abakristu ubakiranye ibyishimo byinshi, none mu izina ry’uwo muryango ngiye kubakoreraho ikimenyetso cy’umusaraba; hanyuma namwe ubwanyu, ndetse n’ababyeyi ba Batisimu mubakorereho icyo kimenyetso cya Kristu Umukiza.

Iyo ari mu Misa cyangwa mu Muhimbazo w’Ijambo ry’Imana, abakristu bashishikarizwa kwiyambaza Abatagatifu bose.

Umusaserdoti: Bavandimwe, nimucyo duhaguruke twese twiyambaze abatagatifu baduhakirwa mu Ijuru.

• Ibisingizo by’Abatagatifu (Bigufi)

Nyagasani utubabarire,
Kristu utubabarire,
Nyagasani utubabarire,
Mariya Mutagatifu Mubyeyi w’Imana, Udusabire.
Yohani Batista Mutagatifu, Udusabire.
Yozefu Mutagatifu, Udusabire.
Petero na Pawulo Batagatifu, Mudusabire.
Abahowe Kristu b’i Buganda batagatifu, Mudusabire.
Bazina bacu batagatifu, Mudusabire.
Babyeyi, nshuti namwe bene wacu mwese, mwageze mu ijuru, Mudusabire.
Batagatifu namwe batagatifukazi b’Imana, Mudusabire.

• Isengesho ryo kubohora ku ngoyi ya Sekibi

Umusaserdoti: Mana ishobora byose igahoraho iteka, wohereje Umwana wawe mu bantu, kugira ngo atuvane ku bubasha bwa Sekibi kandi akure Muntu mu mwijima maze amwinjize mu bwami bw’agatangaza bw’Urumuri rwawe. Turakwinginga twiyoroheje kugira ngo aba bana numara kubakuraho ubwandu bw’icyaha cy’inkomoko, ubagire ingoro yawe ntagatifu kandi ubahe Roho Mutagatifu wawe abaturemo. Ku bwa Kristu, Umwami wacu.

• Isigwa ry’amavuta y’abigishwa

(Abahereza bazanira Umusaserdoti amavuta yanditseho inyuguti za O.C) Umusaserdoti: Ububasha bwa Kristu Umukiza bubakomeze; nibigaragazwe n’aya mavuta y’agakiza tubasigira muri Kristu Nyagasani.

• Guha amazi umugisha

(Umusaserdoti yegera iriba rya Batisimu akavuga iri sengesho):

Bavandimwe,
Dufatanye kwambaza Nyagasani Imana ishobora byose ngo asesekaze muri aba bana ubuzima bushya, ku bw’amazi na Roho Mutagatifu.
Bavandimwe, muzi uburyo Imana yashatse gukungahaza ubuzima bwayo mu bemera ibigirishije ikimenyetso cy’amazi. Nimucyo rero tuyerekezeho imitima yacu, maze dusengere hamwe, kugira ngo itagatifuze iri riba rya Batisimu, maze ibonereho gusendereza ubuzima bwayo muri aba bana yatoye.
Mana yacu, ku bubasha bwawe butagaragara, unonosore ibitangaza mu bimenyetso by’amasakramentu yawe; kuva mu ntangiriro wakoresheje amazi ku buryo bwinshi kugira ngo utegurire abantu kumva neza inema ya Batisimu.
Mana yacu, isi ikiremwa, ni Roho wawe warerembaga ku mazi, ugira ngo ayahe hakiri kare amiringiro y’imbaraga ntagatifu.
Mana yacu, igihe cy’isendera ry’umwuzure, werekanye uburyo bwo kuvuka bundi bushya kuko amazi yashushanyaga ubutsiratsizwe bw’icyaha, n’ukuvuka k’ubutungane.
Mana yacu, wowe wambukije abana ba Abrahamu inyanja y’umutuku, ugira ngo umuryango wawe urokoye mu bucakara, ushushanye imbaga y’ababatijwe.
Mana yacu, Umwana wawe ukunda, yabatirijwe na Yohani mu mazi ya Yorudani, acengerwa na Roho Mutagatifu, kandi igihe yari ku musaraba, urubavu rwe rwavuyemo amazi n’amaraso; amaze no kuzuka yabwiye Abigishwa be ati: “Nimugende, mwigishe amahanga yose, mubabatize mu izina rya Data na Mwana na Roho Mutagatifu” (Mt 28, 19).
None rero, Nyagasani, urebane ubugwaneza Kiliziya yawe, uyivuburemo isoko ya Batisimu. Aya mazi nahabwe ku bwa Roho Mutagatifu inema y’Umwana wawe w’Ikinege, kugira ngo umuntu waremwe mu ishusho yawe, Batisimu iyamwuhagize ubusembwa bwonona iyo shusho, avuke bundi bushya, ku bw’aya mazi no ku bwa Roho Mutagatifu.

(Umusaserdoti agakora mu mazi akoresheje ikiganza cy’iburyo, hanyuma agakomeza)
Mana yacu turakwinginze, ku bw’Umwana wawe, ububasha bwa Roho Mutagatifu nibumanukire kuri aya mazi, kugira ngo abantu bose bahambwe mu Iyobera ry’urupfu rwa Kristu ku bwa Batisimu, hamwe na We bazukire ubuzima bw’ukuri. Tubigusabye ku bwa Yezu Kristu Nyagasani.

Bose: Amen.

• Guhamya Ukwemera

(Iyo Batisimu yatangiwe mu Misa cg mu Muhimbazo w’Ijambo ry’Imana, Ubatiza asaba abakristu bose guhaguruka ngo na bo bahamye Ukwemera bafatanyije n’abaje kubatirisha).

Umusaserdoti: Babyeyi b’aba bana namwe babyeyi ba Batisimu, mu Isakramentu rya Batisimu aba bana mwazanye guhabwa ku bw’amazi na Roho Mutagatifu ubuzima bushya bukomoka ku rukundo rw’Imana.
Ni mwebwe rero mugomba kwihatira kubarera mu kwemera kugira ngo ubwo buzima bw’Imana butazononwa n’icyaha, ahubwo uko bakura bujye burushaho kwiyongera
Niba rero ubukristu mufite ari bwo bwatumye muzana abana banyu, niba kandi mwiyemeje n’umurimo wo kubarera gikristu, nimwiyibutse Batisimu mwebwe ubwanyu mwahawe musubira mu masezerano mwagiranye n’Imana ari yo: kwanga icyaha, gukurikira Yezu Kristu no kumwamamaza.
Nguko Ukwemera kwacu twese, nguko ukwemera kwa Kiliziya yose aba bana bagiye kubatirizwamo.

Kubera iyo impamvu rero:

(Hari abahitamo kubanza guhamya nyuma noneho bagakurikizaho kubaza ababyeyi niba banze ikibi.)

V.: Mwanze Shitani ?
R.: Turayanze.
V.: N’imihango yayo yose ?
R.: Turayanze.
V.: N’ibyo idushukisha byose ?
R.: Turabyanze.
V.: Muhakanye kuzakorera ku bana banyu imihango inyuranyije n’ubukristu; nko kuraguza, guterekera no kubandwa ?
R.: Turabihakanye.

Cyangwa:
V.: Kugira ngo mubeho mu Kwemera kw’abana b’Imana, mwanze icyaha ?
R.: Yee, turacyanze.
V.: Kugira ngo icyaha kitazabagiraho ububasha, mwanze ubushukanyi bwa Sekibi ?
R.: Turabwanze.
V.: Kugira ngo mukurikire Yezu Kristu, mwanze Shitani yo soko y’icyaha?
R.: Yee, turayanze.

• Kwamamaza Ukwemera

(Credo ababyeyi bayifatanya n’abakristu bose bari mu Misa cyangwa mu Muhimbazo w’Ijambo ry’Imana).

V.: Mwemera Imana Data Ushobora byose, Umuremyi w’ijuru n’isi?
R.: Turamwemera.
V.: Mwemera Yezu Kristu, Umwana We w’Ikinege, Nyagasani, wabyawe na Bikira Mariya, akababara agahambwa, akazuka mu bapfuye, none akaba yicaye iburyo bwa Se?
R.: Turamwemera.
V.: Mwemera Roho Mutagatifu, Kiliziya Gatolika, Urusange rw’Abatagatifu, Ikizwa ry’ibyaha, Izuka ry’abapfuye, n’Ubuzima buzahoraho?
R.: Turabyemera.

• Batisimu

V.: Murashaka ko K. cyangwa N. uyu abatizwa mu Kwemera kwa Kiliziya twese tumaze kwamamaza muri aka kanya ?
R.: Yee, turabishaka.
V.: N., Jyewe ndakubatiza ku izina ry’Imana Data + na Mwana, na Roho Mutagatifu.

• Amavuta matagatifu

(Abahereza ba Misa bazanira Umusaserdoti amavuta yanditseho inyuguti za S.C).

Umusaserdoti aravuga ati:

Imana ishobora byose, Se wa Nyagasani Yezu Krisu, yabakijije icyaha inabavukisha bundi bushya mu mazi na Roho Mutagatifu. Yo, ubwayo, ibasize Krisma ikiza, kugira ngo ubwo mumaze kwinjira mu muryango wayo, muzakomeze kuba, ubu no mu buzima bw’iteka, ingingo za Kristu, We Musaserdoti, Umuhanuzi n’Umwami.

Bose: Amen.

• Umwambaro wera

(Umusaserdoti bamuhereza igitambaro cy’umweru akagenda ashyira ku mutwe w’uwabatijwe. Ariko hari igihe, mu Maparuwasi amwe n’amwe, ababatirishije baba bizaniye ibitambaro by’umweru, bitewe n’umuco w’ahantu, akaba ari byo bakoresha.)

Umusaserdoti aravuga ati:

K. na N., mwagizwe ibiremwa bishya; mwambaye Kristu. Uyu mwambaro wera de, uramenyesha ubutorwe bwanyu. None rero muzafashwe n’inama n’ingero nziza muhawe n’ababyeyi, abavandimwe n’inshuti, maze muzawugerane mu buzima bw’iteka utanduye.

Bose: Amen.

• Itara ryaka

(Ababyeyi b’umubiri n’ababyeyi ba Batisimu bakira urumuri bahawe n’Umusaserdoti rukongejwe ku itara ryaka riteretse kuri Alitari. Mu gihe cyose rero ari abana babatijwe, ntibikwiye ko babafatisha za Buji mu ntoki; kuko urumuri ruragizwa ababyeyi.)

Umusaserdoti aravuga ati “Nimwakire Urumuri rwa Kristu”.

Agakomeza agira ati:

“Babyeyi b’aba bana, namwe babyeyi ba Batisimu, uru rumuri ni mwe ruragijwe; maze mukazarwitaho, kugira ngo abana banyu bamurikirwe na Kristu, bizatume bahora bagenza nk’abana b’urumuri. Bityo, bazakomere mu kwemera; Nyagasani naza, bazashobore kumusanganira mu bwami bwe, bishamane na We hamwe n’abatagatifu bose.”

(Hakurikiraho umwanya wo gusoza uwo muhango, nyuma Umusaserdoti agasaba ababyeyi gusubira mu myanya yabo bafite amatara yaka kandi baririmba).

Umusaserdoti akababwira ati:

“Bavandimwe, ku bwa Batisimu, aba bana bavutse mu buzima bushya maze bitwa abana b’Imana kandi koko ni bo.
Umunsi umwe, ku bw’Ugukomezwa, Roho Mutagatifu azabagira abakristu bahamye. Bazagira kandi uruhare ku meza y’Igitambo cya Nyagasani; ni ho bazaririmbira Imana hamwe n’ikoraniro ritagatifu, bayita: ‘Data uri mu ijuru’.”
None rero bavandimwe, Mu kigwi cy’aba bana Batisismu yagize abana b’Imana, twebwe twese abo Data ushobora byose yihitiyemo, nimucyo tuvugire hamwe (turirimbire hamwe) isengesho Yezu yatwigishije.
Dawe uri mu ijuru….

• Umugisha

V.: Imana yo soko y’ubuzima n’urukundo, igenera abagore umutima wa kibyeyi bagirira abo bibarutse; nirebane impuhwe aba bakristukazi kugira ngo bayishimire ko yabahaye kubyara no guheka, bazanezezwe n’uko abana babo bakurana urukundo, ubwitonzi n’ubutungane.
R.: Amen.
V.: Imana ni yo Soko n’urugero rw’ububyeyi, niragirane urukundo ba se b’aba bana, maze imigenzereze yabo izafashe aba bana kugera ku bukristu bwuzuye.
R.: Amen.
V.: Imana ikunda abantu bose, nta we yibagirwa mu bari hano, mu bavandimwe no mu nshuti. Nibarengere muri byose, maze buri wese imusendereze amahoro.
R.: Amen.
V.: Ushobora byose nabahe umugisha: Imana + Data, na Mwana, na Roho Mutagatifu. R.: Amen.
V.: Nimujyane amahoro ya Kristu.
R.: Dushimiye Imana.

B) BATISIMU Y’UMWANA URWAYE

(reba Rituel du Baptême des petits enfants, pp. 105-106)

. Bazana amazi abonetse yose. Iruhande rw’umwana urwaye hahagaze ababyeyi be, byashoboka n’umubyeyi wa Batisimu ndetse n’abaturanyi.
. Ugiye kubatiza asaba abari aho gufatanya na we bagasenga. Yabikora muri aya magambo:

Bavandimwe, nimucyo dusabire uyu mwana ugiye kubatizwa, dusabire kandi n’ababyeyi be b’umubiri ndetse n’umubyeyi wa Batisimu, dusabire n’ababatijwe bose.Tubizirikane twisunze Yezu Kristu Umwami wacu.

Agasoza avuga iri sengesho:

Nyagasani Mana yacu, Se w’Umwami wacu Yezu Kristu, Wowe ukunda ubuzima buguturukaho, ni Wowe mizero yacu n’imbaraga zacu; washatse ko ikiremwa cyose wahanze gihorana ubuzima; Urukundo rwawe ruha abantu kuvuka bundi mu bugingo bw’iteka babikesha ingabire ya Batisimu.Umva isengesho ryacu tugutuye dutakambira uyu mwana urwaye, ngo umurinde imbaraga za Sekibi maze umwinjize mu muryango wawe ari wo Kiliziya. Ubigirishije aya mazi hamwe n’imbaraga za Roho Mutagatifu, ha uyu mwana witwa K. cyangwa N. kuba umwana wawe wihitiyemo. Ku bwa Yezu Kristu Umwami wacu.

Bose: Amen.

Hakurikiraho guhamya ukwemera. Umusaserdoti aravuga ati: Twiyibutse Batisimu twahawe twongera guhamya Ukwemera kwacu, ari na ko uyu mwana agiye kubatirizwamo.

Umusaserdoti akabaza ababyeyi ibi bibazo:

V.: Mwemera Imana Data ushoborabyose umuremyi w’ijuru n’isi?
R.: Turamwemera.
V.: Mwemera Yezu Kristu, Umwana we w’ikinege, Nyagasani, wabyawe na Bikira Mariya, akababara, agapfa, agahambwa, akazuka mu bapfuye none akaba yicaye iburyo bwa Se?
R.: Turamwemera.
V.: Mwemera na Roho Mutagatifu, Kiliziya gatolika ntagatifu n’urusange rw’abatagatifu, ikizwa ry’ibyaha, izuka ry’abapfuye n’ubuzima buzahoraho?
R.: Turabyemera.

Mu guhamya ukwemera, bashobora kuvuga gusa “Nemera Imana Data...”. Hanyuma Umusaserdoti akabatiza umwana avuga amagambo akoreshwa muri Batisimu:

N., Jye, ndakubatiza ku Izina ry’Imana Data, na Mwana, Na Roho Mutagatifu.

Bose: Amen.

Indi mihango ntabwo ikorwa. Gusa bishobotse umwana bamushyiraho umwambaro wera. Icyo gihe Umusaserdoti aravuga ati:

K. cyangwa N., wagizwe ikiremwa gishya; “wambaye Kristu”. Uyu mwambaro wera de, uramenyesha ubutorwe bwawe; kandi uzawugerane mu buzima bw’iteka utanduye.

Hanyuma bose bakavuga cyangwa bakaririmba isengesho rya “Dawe uri mu ijuru”.

Iyo nta musaserdoti uhari, umukristu wahawe amasakramentu ashobora kumubatiza; icyo gihe atera “Nemera Imana Data....” hanyuma akamusuka amazi ku gahanga avuga amagambo akoreshwa mu gihe cyo kubatiza. Igihe arembye ntabwo bahamya ukwemera.

Niba umwana arimo gusamba

Birahagije ko ubatiza aba ari kumwe n’abagabo babiri bashobora kubihamya cyangwa umwe, hanyuma agasuka amazi ku mutwe w’umurwayi avuga amagambo yabugenewe: Jye, ndakubatiza ku Izina ry’Imana Data, na Mwana, Na Roho Mutagatifu.

Indi mihango si ngombwa.

C) KWAKIRA MURI KILIZIYA UMWANA WABATIJWE ARWAYE

(reba Rituel du Baptême des petits enfants, pp. 107-112)

(Bikorwa iyo uwabatijwe arwaye yongeye kugira ubuzima bwiza)

Umusaserdoti yambara ikanzu n’indangabubasha cyangwa siripuli; ashobora kwambara shape. Ku ndangabubasha (na shape), ni uguhitamo ibara rigaragaza ibyishimo; ubusanzwe ni Umweru. Igihe ikoraniro riteye indirimbo yo gutangira, umusaserdoti asanganira ababyeyi b’uwo mwana ku muryango wa Kiliziya, abo babyeyi kandi bagomba kuba bafite uwo mwana hamwe n’umwambaro wera.

INTANGIRIRO

Umusaserdoti asuhuza abateraniye aho cyane cyane ababyeyi b’umubiri n’uwa Batisimu. Abibutsa mu magambo make akababaro bari batewe n’uko umwana yari arwaye kandi ameze nabi, nyuma ukuntu bifuje kumubatirisha muri ibyo bihe bibi yari arimo. Hamwe n’ababyeyi agashimira Imana yatumye umwana akira.

IKIGANIRO N’ABABYEYI B’UMWANA

Umusaserdoti akabaza ababyeyi b’umubiri muri aya magambo cyangwa andi asa na yo:
Uyu mwana mwahisemo kumwita irihe zina?

Ababyeyi: K. cyangwa N.

Umusaserdoti: K. cyangwa N. yarabatijwe. Kuva uyu munsi umuryango w’Imana urazirikana ko ku bwa Batisimu uyu mwana yakiriwe muri Kiliziya. Ubu ni mwebwe ababyeyi mugomba kwihatira kumurera mu kwemera, mumutoza gukurikiza amategeko y’Imana, agakunda Imana na mugenzi we nk’uko Kristu yabiduhayemo urugero. Ibyo murabizi ?

Ababyeyi: Yego (Turabizi).

Umusaserdoti akabaza umubyeyi wa Batisimu muri aya magambo cyangwa andi asa na yo:

Nawe mubyeyi wa Batisimu, ugomba kuzafasha ababyeyi b’umubiri ba K. cyangwa N. mu kurangiza inshingano zabo. Urabona uzabishobora?

Umubyeyi: Yego (ndabona nzabishobora).

IKIMENYETSO CY’UMUSARABA

Umusaserdoti: K. cyangwa N. hamwe n’ababyeyi bawe turashimira Imana kandi twishimiye kukwakira, ubwo uri muzima, wakiriwe muri Kiliziya; Yezu yagukikije ku bwa Batisimu, ubu nawe ubariwe mu ngingo z’umubiri We. None mu izina ry’uwo muryango, ngiye kugukoreraho ikimenyetso cy’umusaraba, ari cyo kimenyetso cya Kristu Umukiza. Hanyuma n’ababyeyi bawe ndetse n’umubyeyi wa Batisimu na bo bagukorereho icyo kimenyetso.

Umusaserdoti amukorera ikimenyetso cy’umusaraba ku gahanga atavuga, hanyuma agasaba n’ababyeyi b’umubiri ndetse n’uwa Batisimu kukimukoreraho.

Hakurikiraho guhimbaza Ijambo ry’Imana: Gusoma Ijambo ry’Imana, inyigisho, kuzirikana, Isengesho rusange no kwiyambaza abatagatifu. Icyo gice gisozwa n’isengesho, aho umusaserdoti avuga ati:

Nyagasani Mana yacu, soko y’ubuzima n’urukundo, Se wa Yezu Kristu,wowe wahaye ababyeyi bose umutima wa kibyeyi, ukababa hafi igihe abana barwaye n’igihe babatizwa ukigaragaza nk’Umukiza. Kiliziya yawe yasazwe n’ibyishimo. Turasabira umwana wawe K. cyangwa N. wamuvanye mu mwijima umwinjiza mu rumuri rw’isakramentu rya Batisimu, wamugize umwana wihitiyemo n’ingoro ya Roho Mutagatifu; murinde ibyago by’ubu buzima, mufashe guhora arangamiye ijuru ku bw’imbaraga za Kristu Umukiza. Ku baw Yezu Kristu Umwami wacu.

Bose: Amen.

UMUHANGO WO GUSIGWA AMAVUTA YA KRISMA

Umusaserdoti: Imana ishoborabyose, Se w’Umwami wacu Yezu Kristu yagukijije icyaha inakuvukisha bundi bushya ku bw’amazi na Roho Mutagatifu. Yo, ubwayo, igusize Krisma ikiza, kugira ngo ubwo umaze kwinjira mu muryango wayo, uzakomeze kuba, ubu no mu buzima bw’iteka, ingingo za Kristu, We Musaserdoti, Umuhanuzi n’Umwami.

Bose: Amen.

Hanyuma Umusaserdoti akamusiga amavuta ya Krisma ku gahanga.

UMWAMBARO WERA

Umusaserdoti: K. cyangwa N. wagizwe ikiremwa gishya; wambaye Kristu. Uyu mwambaro wera de, uramenyesha ubutorwe bwawe . None rero uzafashwe n’inama n’ingero nziza uhawe n’ababyeyi, abavandimwe n’inshuti, maze uzawugerane mu buzima bw’iteka utanduye.

Bose: Amen.

ITARA RYAKA

Umusaserdoti ahereza urumuri ababyeyi b’umubiri n’umubyeyi wa Batisimu.

Umusaserdoti aravuga ati: “Nimwakire Urumuri rwa Kristu”.

Agakomeza agira ati: “Babyeyi b’aba bana, namwe babyeyi ba Batisimu, uru rumuri ni mwe ruragijwe, maze mukazarwitaho, kugira ngo abana banyu bamurikirwe na Kristu, bizatume bahora bagenza nk’abana b’urumuri. Bityo, bazakomere mu kwemera; Nyagasani naza, bazashobore kumusanganira mu bwami bwe, bishamane na We hamwe n’abatagatifu bose.”

Bose: Amen.

(Hakurikiraho umwanya wo gusoza uwo muhango, nyuma Umusaserdoti agasaba ababyeyi gusubira mu myanya yabo bafite amatara yaka kandi baririmba.)

Umusaserdoti akababwira ati:

“Bavandimwe, Ku bwa Batisimu, uyu mwana yavutse mu buzima bushya maze yitwa umwana w’Imana kandi koko ni we. Umunsi umwe, ku bw’Ugukomezwa, Roho Mutagatifu azamugira umukristu uhamye. Azagira kandi uruhare ku meza y’Igitambo cya Nyagasani; ni ho azaririmbira Imana hamwe n’ikoraniro ritagatifu, ayita: ‘Data uri mu ijuru’.”
None rero bavandimwe,
Mu kigwi cy’uyu mwana Batisismu yagize umwana b’Imana, twebwe twese abo Data ushobora byose yihitiyemo, nimucyo tuvugire hamwe (turirimbire hamwe) isengesho Yezu yatwigishije: Dawe uri mu ijuru…

UMUGISHA USOZA

Umusaserdoti abanza guha umugisha nyina w’umwana amuhagatiye, hanyuma na se ndetse n’ababaherekeje.

Umusaserdoti: Nyagasani ushoborabyose yahaye ibyishimo ababyeyi bamwemera abigirishije Umwana we wabyawe na Bikira Mariya. Yabahaye kwizera ko abana babo bazagira ubugingo bw’iteka, nahe Umugisha nyina w’umwana, uko yagize ibyishimo amubyaye n’igihe amubonye yakize; hamwe n’umwana we bazahore bashimira Imana ubudahwema. Ku bwa Yezu Kristu Umwami wacu.
Bose: Amen.

Umusaserdoti: Nyagasani Imana ushoborabyose We utanga ubuzima ku isi no mu ijuru, nahe umugisha se w’uyu mwana. Haba mu magambo no mu bikorwa azahore afatanya n’umugore we gutoza umwana wabo ukwemera nyakuri. Ku bwa Yezu Kristu Umwami wacu.
Bose: Amen.

Umusaserdoti: Nyagasani Imana ushobora byose, We waduhaye kuvuka bundi bushya ku bw’amazi na Roho Mutagatifu, nahe umugisha abateraniye hano bose; bahore bizihiwe no kubarirwa mu mryango we mutagatifu. Ku bwa Yezu Kristu Umwami wacu.
Bose: Amen.

Umusaserdoti: Namwe abateraniye hano mwese; Ushobora byose nabahe umugisha Imana Data, na Mwana + na Roho Mutagatifu.
Bose: Amen.

Umusaserdoti: Nimujyane amahoro ya Kristu.
Bose: Dushimiye Imana.