Noveni ya Roho Mutagatifu

NOVENI YA ROHO MUTAGATIFU:

Twitegure Pentekositi

“Umunsi wa Pentekositi uragera, bose bakaba bakoraniye hamwe. Ako kanya, umuriri umeze nk’inkubi y’umuyaga uva mu ijuru, maze wuzura mu nzu bari barimo. Nuko haboneka indimi zisa n’iz’umuriro, zigabanya zijya kuri buri muntu muri bo. Ubwo bose buzuramo Roho Mutagatifu, batangira kuvuga mu zindi ndimi, uko Roho abahaye kuzivuga. Aho rero i Yeruzalemu habaga Abayahudi bubaha Imana, bari baraturutse mu mahanga yose ari mu nsi y’ijuru. Ngo bumve urwo rusaku, rubanda rwose barakorana maze barumirwa, kuko buri wese yabumvaga bavuga mu rurimi rwe bwite.
Barashoberwa, batangara bavuga bati «Mbese aba bose bavuga si Abanyagalileya? Bishoboka bite se ko buri muntu muri twe abumva bavuga mu rurimi rwe kavukire? Baba Abapariti, Abamedi n’Abelamu, baba abatuye muri Mezopotamiya, muri Yudeya no muri Kapadosiya, muri Ponti no muri Aziya, muri Furujiya no muri Pamfiliya, mu Misiri no mu turere twa Libiya duhereranye na Sireni, baba abashyitsi baturutse i Roma, Abayahudi kavukire n’abayoboke b’idini yabo, Abanyakireta n’Abarabu, twese turabumva bamamaza mu ndimi zacu bwite ibitangaza by’Imana.» Bose bari bumiwe, bagatangara babazanya bati «Ibi birashaka kuvuga iki?» Ariko hakaba n’abandi babakwena, bagira bati «Aba bantu basinze divayi nshyashya!» (Intu 2, 1-13)

Umunsi wa 1

• Isengesho: Ngwino Roho Mutagatifu
• Ingingo tuzirikana: NATWE DUTEGEREJE ROHO MUTAGATIFU

• Ijambo ry’Imana: Ibyakozwe n’Intumwa 1,3-14

Igihe yariho asangira na bo, abategeka ko batazatirimuka i Yeruzalemu, ahubwo ko bazahategerereza ibyo Imana Data yasezeranye. Arababwira ati «Ni na byo mwanyumvanye : ngo Yohani yabatirishije amazi, naho mwebwe muzabatirizwa muri Roho Mutagatifu nyuma y’iminsi mikeya.»Nuko bakaba bateraniye hamwe, maze baramubaza bati «Nyagasani, ubu se ni ho ugiye kubyutsa ingoma ya Israheli?» Arabasubiza ati «Si mwebwe mugenewe kumenya ibihe n’amagingo Data yageneye ubutegetsi bwe bwite, ahubwo mugiye guhabwa imbaraga za Roho Mutagatifu uzabazamo, bityo muzambere abahamya i Yeruzalemu, muri Yudeya yose no muri Samariya, ndetse no kugera ku mpera y’isi.»
Amaze kuvuga atyo azamurwa mu ijuru bamureba, maze igicu kiramukingiriza ntibongera kumubona. Uko bagahanze amaso ejuru Yezu amaze kugenda, babona abantu babiri bambaye imyambaro yererana bahagaze iruhande rwabo. Barababaza bati «Yemwe bagabo b’i Galileya, ni iki kibahagaritse aho mureba mu ijuru ? Yezu uwo ubavanywemo akajyanwa mu ijuru, azaza nk’uko mumubonye ajya mu ijuru.»
Bava ku musozi witwa uw’Imizeti bagaruka i Yeruzalemu, - uwo musozi ukaba bugifi ya Yeruzalemu, nk’urugendo bemerewe gukora ku isabato -. Bahageze, bazamuka mu cyumba cyo hejuru aho babaga. Abo ni Petero, Yohani, Yakobo, Andereya, Filipo na Tomasi, Baritolomayo na Matayo, Yakobo mwene Alufeyi, Simoni umunyeshyaka, na Yuda mwene Yakobo. Bose barangwaga n’umutima umwe, bagashishikarira gusenga, barimo Mariya Nyina wa Yezu, n’abavandimwe be.

• Ikibazo: Umutima wanjye witeguye ute kwakira Roho Mutagatifu?
• Ingabire dusaba: UBUHANGA N’UBWENGE
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 2

• Isengesho: Ngwino Roho Mutagatifu
• Ingingo tuzirikana: ROHO MUTAGATIFU TWASEZERANYIJWE ADUTUYEMO

• Ijambo ry’Imana: Yoweli 3,1-5

Nyuma y’ibyo, nzasendereza Umwuka wanjye ku cyitwa ikiremwa cyose. Abahungu banyu n’abakobwa banyu bazahanure, abasaza banyu bazabonere mu nzozi, urubyiruko rwanyu ruzabonekerwe.Koko muri iyo minsi, abagaragu n’abaja nzabasenderezamo Umwuka wanjye. Nzakora ibitangaje mu kirere no hasi ku isi, hazaboneke amaraso, umuriro n’inkingi y’umwotsi. Izuba rizijima, ukwezi guhinduke amaraso mbere y’uko haza Umunsi w’Uhoraho, umunsi ukomeye kandi uteye ubwoba ! Ubwo abaziyambaza izina ry’Uhoraho bose bazakizwa.

• Ikibazo: Roho Mutagatifu untuyemo amarira iki?
• Ingabire dusaba: UBUJYANAMA N’UBUTWARI
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 3

• Isengesho: Ngwino Roho Mutagatifu
• Ingingo tuzirikana: TWAVUTSE BUNDI BUSHYA MU MAZI NA ROHO MUTAGATIFU
• Ijambo ry’Imana: Yohani 3,1-6
Muri icyo gihe, mu Bafarizayi hari umugabo witwaga Nikodemu, akaba umwe mu Bayahudi b’abategetsi. Nuko aza nijoro asanga Yezu, aramubwira ati “Rabbi, tuzi ko uri umwigisha waturutse ku Mana; kuko nta muntu washobora gutanga ibimenyetso nk’ibyo werekana, atari kumwe n’lmana.” Yezu aramusubiza ati « Ndakubwira ukuri koko : nta muntu n’umwe ushobora kubona Ingoma y’Imana, atavutse ubwa kabiri.» Nikodemu aramubwira ati « Umuntu ashobora ate kuvuka kandi ashaje ? Yashobora se gusubira mu nda ya nyina ngo yongere avuke?» Yezu aramusubiza ati « Ndakubwira ukuri koko: umuntu atavutse ku bw’amazi no ku bwa Roho, ntashobora kwinjira mu Ngoma y’Imana. Icyavutse ku mubiri kiba ari umubiri, n’icyavutse kuri Roho kikaba roho.

• Ikibazo: Ngerageza nte kuba indahemuka ku masezerano ya Batisimu?
• Ingabire dusaba: UBUMENYI N’UBUSABANE KU MANA
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 4

• Isengesho:Ngwino Roho Mutagatifu
• Ingingo tuzirikana: ROHO MUTAGATIFU NI UMUGABA W’INEMA ZOSE,AZABAYOBORA KU KURI

• Ijambo ry’Imana: Yohani 16,7-15
Ariko mbabwire ukuri, ngiye byabagirira akamaro ; kuko ntagiye, Umuvugizi ntiyabazamo, ariko ningenda nzamuboherereza.Kandi namara kuza azereka ab’isi aho icyaha cyabo kiri, n’aho ubutungane buri, n’urubanza uko ruteye. Azabereka icyaha cyabo, kuko batanyemeye; azabereka aho ubutungane buri, kuko ngiye kwa Data kandi mukaba mutakimbonye ; azabereka uko urubanza ruteye, kuko Umutware w’iyi si yaciriwe urubanza.
«Ndacyafite byinshi nababwira, ariko ubu ntimwashobora kubyakira. Ariko Roho Nyir’ukuri uwo naza, azabayobora mu kuri kose kuko atazavuga yitumirije, ahubwo azavuga ibyo yumvise byose, kandi akazabahanurira n’ibizaza. Azampesha ikuzo, kuko azahabwa ku byanjye akabibamenyesha. Ibyo Data atunze byose ni ibyanjye ; ni cyo kinteye kuvuga ko azafata ku byanjye maze akabibamenyesha. »

• Ikibazo: Ese ntoza umutima wanjye kumvira Roho Mutagatifu ngo mbeho mu kuri?
• Ingabire dusaba: IGITINYIRO CYA NYAGASANI
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 5

• Isengesho: Ngwino Roho Mutagatifu
• Ingingo tuzirikana: ROHO MUTAGATIFU ADUSABISHIRIZA IMIVUMERO IRENZE IMIVUGIRWE KANDI AGATUMA TWERA IMBUTO ZIMUKOMOKAHO

• Ijambo ry’Imana: Abanyaroma 8,19-27
Ndetse n’ibiremwa byose birarekereje ngo birebe igaragazwa ry’abana b’Imana: n’ubwo ibyo biremwa bitagifite aagaciro, atari ku bushake bwabyo, ahubwo ku bw’Uwabigennye atyo, biracyafite amizero. Kuko n’ibyaremwe ubwabyo bizagobotorwa ingoyi y’ubushanguke maze bigasangira ubwigenge n’ikuzo by’abana b’Imana. Tuzi neza ko na n’ubu ibiremwa byose binihira icyarimwe, nk’ibiri mu mibabaro yo kuramukwa. Nyamara si byo byonyine, ndetse natwe abahawe Roho Mutagatifu ho umuganura turaganyira mu mutima, dutegereje kugirwa abana b’Imana, ugucungurwa kw’imibiri yacu. Koko rero twarakijijwe mu bwizere ; nyamara kureba ibyo wizeraga ntibiba bikiri ukwizera. Iyo umuntu yirebera aba acyizeye iki kindi? Niba rero twizeye icyo tutareba ubu ngubu, twihanganiye kugitegereza. Bityo ni ko na Roho atabara intege nke zacu kuko tutazi icyo twasaba uko bikwiye, maze Roho ubwe akadutakambira mu miniho irenze imivugirwe. Kandi Nyirugusuzuma imitima akaba azi icyo Roho yifuza, kuko atakambira abatagatifujwe ku buryo buhuje n’Imana.

• Ikibazo: Ni izihe mbuto za Roho Mutagatifu nerera abandi?
• Ingabire dusaba: IMBARAGA N’UKWIFATA
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 6

• Isengesho: Ngwino Roho Mutagatifu
• Ingingo tuzirikana: ROHO MUTAGATIFU NI UMUVUGIZI UTUMA TUBERA KRISTU ABAHAMYA

• Ijambo ry’Imana: 1 Yohani 4, 11-21
Nkoramutima zanjye, ubwo Imana yadukunze bigeze aho, natwe tugomba gukundana. Nta muntu wigeze abona Imana, ariko niba dukundana, Imana idutuyemo kandi urukundo rwayo ruba ruganje muri twe. Aho tumenyera ko turi mu Mana, na Yo ikatubamo, ni uko yaduhaye kuri Roho wayo. Natwe twarabyitegereje, none turahamya ko Imana Data yohereje Umwana wayo kuba Umukiza w’isi. Umuntu wese uhamya ko Yezu ari Umwana w’Imana, Imana imuturamo, na we akayituramo. Twebwe twamenye urukundo Imana yatugaragarije, kandi turarwemera. Imana ni urukundo: umuntu uhorana urukundo aguma mu Mana, na Yo ikamugumamo.
Nguko uko urukundo rwaganje muri twe, ku buryo nta bwoba dutewe n’umunsi w’urubanza; kuko uko Yezu ameze, ari ko natwe tumeze muri iy’isi. Nta bwoba bubangikana n’urukundo; ahubwo urukundo rushyitse rwirukana ubwoba, kuko ubwoba buterwa n’igihano maze ufite ubwoba ntagire urukundo rushyitse.
Twebweho tujye dukundana, kuko Imana yadukunze mbere. Niba umuntu avuze ati «Nkunda Imana», ariko akanga umuvandimwe we, aba ari umubeshyi. Koko rero, umuntu udakunda umuvandimwe we abonesha amaso, ntashobora gukunda Imana atabona. Dore rero itegeko Kristu yaduhaye: ukunda Imana, akunde n’umuvandimwe we.

• Ikibazo: Ngaragaza nte urukundo rw’Iman mu mibanire yanjye n’abandi?
• Ingabire dusaba: UBUSHYIRA MU GACIRO N’UW'IMBABAZI
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 7

• Isengesho:Ngwino Roho Mutagatifu
• Ingingo tuzirikana: NIMUREKE ROHO ABAYOBORE NI WE UTAGATIFUZA IMITIMA YANYU

• Ijambo ry’Imana: Abanyagalati 5,16-25
Mureke mbabwire: Roho nabayobore, ni bwo mutazakora ibyo umubiri urarikira. Kuko umubiri urarikira ibirwanya Roho, na Roho igakurikirana ibyo umubiri wangira. Ibyo byombi koko birazirana kuburyo namwe mutagenza uko mwishakiye kose.
None rero, niba muyoborwa na Roho, ntabwo mu kigengwa n’amategeko. Ibikorwa by’umubiri birigaragaza: ubusambanyi, ubuhabara, ubwomanzi,gusenga ibigirwamana,kuroga,kwangana, gukurura intonganya, ishyari, uburakari, kwikuza, amazimwe, amakimbirane, inzika,ubusinzi, ubusambo, n’ibindi nk’ibyo. Ndababuriye nk’uko nigeze kubibabwira: abakora bene ibyo, nta murage bazahabwa mu Bwami bw’Imana.
Naho imbuto ya Roho ni urukundo: ibyishimo, amahoro, kwihangana, ubugwaneza, ubuntu, ubudahemuka, imico myiza, kumenya kwifata. Nta tegeko ribuza imigirire nk’iyo. Aba Kristu Yezu babambye ku musaraba umubiri wabo n’ingeso mbi ndetse n’irari. Niba tubeshejweho na Roho, nituyoborwe na Roho.

• Ikibazo: Mbasha nte gutandukanya ibyifuzo by’umubiri n’ibya Roho Mutagatifu?
• Ingabire dusaba: UBWICISHE BUGUFI N’UBUMANZI
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 8

• Isengesho: Ngwino Roho Mutagatifu
• Ingingo tuzirikana: YEZU NTIYADUSIZE TURI IMFUBYI; DUFITE RERO INSHINGANO YO KWAKIRA ROHO MUTAGATIFU

• Ijambo ry’Imana: Yohani 14,15-20.25-27
«Niba munkunda koko, muzubaha amategeko yanjye. Nanjye nzasaba Data azabahe undi Muvugizi, uzaza kubana namwe iteka. Uwo ni Roho Nyir’ukuri isi idashobora kwakira, kuko itamubona kandi ntimumenye. Mwebwe ariko muramuzi, kuko abana namwe kandi akababamo. Sinzabasiga muri imfubyi, nzagaruka mbasange. Hasigaye igihe gito isi ntizongere kumbona. Ariko mwe muzambona, kuko ndiho kandi namwe mukazabaho. Uwo munsi muzamenya ko mba muri Data, kandi namwe mukaba muri jye nk’uko nanjye ndi muri mwe.
Ibyo mbibabwiye nkiri kumwe namwe, ariko Umuvugizi Roho Mutagatifu, Data azohereza mu izina ryanjye, ni we uzabigisha byose kandi abibutse n’ibyo nababwiye byose. Mbasigiye amahoro, mbahaye amahoro yanjye. Sinyabahaye nk’uko isi iyatanga. Ntimukuke umutima kandi ntimugire ubwoba.”

• Ikibazo: Nkora iki kugira ngo nsakaze amahoro nzanirwa na Roho Mutagatifu?
• Ingabire dusaba : UKWEMERA N’UKWIZERA
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

Umunsi wa 9

• Isengesho: Ngwino Roho Mutagatifu
• Ingingo tuzirikana: NIMWAKIRE ROHO MUTAGATIFU UBAHUNDA INGABIRE ZE

• Ijambo ry’Imana: Ezekiyeli 36,25-29
“Nzabuhagiza amazi asukuye maze mube abasukure ; mbahanagureho ubwandure bwanyu bwose, muce ukubiri n’ibigirwamana byanyu byose. Nzabaha umutima mushya, mbashyiremo n’umwuka mushya. Mu mubiri wanyu nzakuramo umutima w’ibuye, nshyiremo umutima wumva. Nzabuzuzamo umwuka wanjye, mbatere gukurikiza amategeko yanjye, mwubahirize amabwiriza yanjye. Muzatura igihugu nahaye abakurambere banyu, mumbere umuryango nanjye mbe Imana yanyu. Nzabakiza ubwandu bwanyu bwose. Nzameza ingano kandi nzigwize, sinzongera kubicisha inzara ukundi.

Umugambi: NITWOROHERE ROHO MUTAGATIFU KUGIRA NGO NK’ABAKRISTU ADUTOZE GUKORERA IMANA MU BY’UKURI.
• Ingabire dusaba: URUKUNDO N’AMAHORO
• Dawe uri mu ijuru
• Ndakuramutsa Mariya
• Hubahwe Imana Data
Ohereza Roho wawe, maze ubwisanzure bw’isi bube bushya!

INDIRIMBO: ROHO W’IMANA NGWINO

Roho w’Imana ngwino, Roho w’Imana ngwino, Roho w’Imana ngwino; ngwino utuyobore.

1. Ngwino utwiyoborere, mu nzira igana ijuru, utubere urumuri tunogere Imana.
2. Ngwino hafi yacu, mu buzima bwacu, udutere imbaraga, dutsinde umushukanyi.
   
3. Ngwino uhoze abarira, indushyi n’abihebye, bashire agahinda, basingize Imana.
   
4. Murengezi wacu, hari abashikamiwe, barengana rwose, ca ingoyi ibaziritse.
   
5. Mwigisha w’ukuri, dutsindire inzangano, tumenye gukundana, tubere isi urumuri.
   
6. Mbaraga z’abemera, komeza Kiliziya, ihore ibengerana, urukundo n’ukuri.